ހިއުމަން ރައިޓްސް ވޮޗުން ނެރުނު ރިޕޯޓުގައި ފާހަގަކޮށްފައިވާ މައްސަލަތައް އިސްލާހު ކުރުމަށް ގޮވާލައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް އެ މައްސަލަ ހުށައެޅުއްވީ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފެވެ. އެމައްސަލާގައި ބުނެފައިވަނީ އެއްވެ އުޅުމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަން ކަށަވަރުކޮށްދިނުމުގައި ސަރުކާރު ފެއިލްވެފައިވާ ކަމަށް ހިއުމަން ރައިޓްސް ވޮޗުން ނެރުނު ރިޕޯޓުގައިބުނެފައިވާ ކަމަށެވެ.

މި ސަރުކާރު ވެރިކަމަށް އައުމަށްވީ ވަޢުދުތަކުގެ ތެރޭގައި އެއްވެ އުޅުމަށް ހުރަސް އެޅޭ ގޮތަށް ހުރި ގާނޫނުތައް އުވާލާނެ ކަމަށް ބުނެފައިވާ ކަމަށާއި ނަމަވެސް އަދިވެސް ފެންނަނީ ހާލަތާ ނުބައްދަލު ބާރުގެ ބޭނުންކޮށްގެން މުޒާހަރާތަކަށް ހުރަސް އަޅަމުންދާތަން ކަމަށް ވެސް މައްސަލާގައިވެއެވެ.

އޭގެއިތުރުން މަރު ކޮމިޝަންގެ ތަހުގީގުން އެކަށީގެންވާ ކުރިއެރުމެއް ލިބިފައި ނުވާކަމަށާއި ޝަރުއީ ދާއިރާ އިސްލާހު ކުރަން މި ސަރުކާރުން ވެފައިވާ ވައުދާ އެއްގޮތަށް ޖުޑީޝަލް ސާވިސް ކޮމިޝަން (ޖޭއެސްސީ) އިސްލާހު ކޮށްފައިނުވާކަމަށް އެ މައްސަލާގައި ބުނެފައިވެ އެވެ. އެހެންކަމުން ހިއުމަން ރައިޓްސް ވޮޗުން ނެރުނު ރިޕޯޓުގައި ފާހަގަކޮށްފައިވާ ކަންތައްތައް އިސްލާޙު ކުރުމަށް ކުއްލި މައްސަލާގައި ސަރުކާރަށްވަނީ ގޮވާލައްވާފައެވެ.

އެ މައްސަލައަށް މަޖިލީހުގައި ބަހުސް ކުރުމަށް ފެންނަ ކަމަށް ވޯޓު ދެއްވީ 8 މެމްބަރުންނެވެ. އަދި ނުފެންނަ ކަމަށް 32 މެމްބަރުން ވަނީ ވޯޓު ދެއްވާފައެވެ.