ޕްރިންސިޕަލުންގެ މުސާރަ 30،000 ރުފިޔާއަށް ވުރެ ބޮޑުކޮށްފިއެވެ.

ތައުލީމީ ދާއިރާގައި މަސައްކަތް ކުރައްވާ 8،889 މުވައްޒަފުންގެ މުސާރަ ބޮޑުކޮށްފައިވާއިރު މިކަމަށް ދައުލަތުގެ ބަޖެޓުން އަހަރަކު 488 މިލިއަން ރުފިޔާ އިތުރަށް ޚަރަދު ކުރާނެ އެވެ.

މިހާރު ކުރިއަށްދާ ނޫސްވެރިންގެ ބައްދަލުވުމުގައި ދަޢުލަތުގެ މާލީ ވަޒީރު އިބްރާހިމް އަމީރު ވިދާޅުވީ މިމަހުން ފެށިގެން ޕްރިންސިޕަލުންނާއި ޓީޗަރުންގެ މުސާރަ ބޮޑުކުރަން ނިންމުމާއެކު، ޕްރިންސިޕަލުންނަށް އެންމެ ދަށްވެގެން ގެއަށް ގެންދަން މަހަކު 30،600 ރުފިޔާ ލިބޭނެ ކަމަށެވެ. މިއީ ޖުމްލަކޮށް 82 އިންސައްތައިގެ ކުރިއެރުމެއް ކަމަށް އަމީރު ވިދާޅުވިއެވެ.

ރާއްޖޭގައި މިވަގުތު ރޭންކު 1 ގެ 127 ޕްރިންސިޕަލުން ތިބި އިރު ޕްރިންސިޕަލް ރޭންކް 2 ގައި މިވަގުތު 46 ޕްރިންސިޕަލުން އެބަ ތިއްބެވެ.

އަމީރު ވިދާޅުވީ މުސާރައަށް ގެނެވުނު ބަދަލުތަކާއެކު ދެން މުސާރަ ދޭނީ އަސާސީ މުސާރައާއި ވަޒީފާގެ އެލަވަންސްތަކުގެ އިތުރުން ހާޒިރުވާ ދުވަސްތަކަށް ދޭ އެލަވަންސްތަކުގެ މައްޗަށް ކަމަށެވެ. މި ބަދަލާއެކު، ޑެޕިއުޓީ ޕްރިންސިޕަލުންނަށް މަހަކު 26،000 ރުފިޔާ މުސާރައިގެ ގޮތުގައި ލިބިގެންދާނެއެވެ.

ތަޢުލީމީ ދާއިރާގެ މުވައްޒަފުންގެ މުސާރައަށް ސަރުކާރުން މިއަދު ބަދަލުގެނެސްފައިވާއިރު މިއީ ރަށްރަށުގައި ވަޒީފާ އަދާކުރުމަށް ޕްރިންސިޕަލުންނާއި ޓީޗަރުންނަށްވެސް ލިބޭނެ އިތުރު ބާރަކަށްވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް މިއަދު ވަނީ ވިދާޅުވެފައެވެ.