އިއްޔެ ނިމިގެންދިޔަ އެމްޑީޕީގެ އެތެރޭގެ އިންތިޚާބުން ފެނިގެންދިޔައީ އެމްޑީޕީގެ އެތެރޭގެ ވަރުގަދަ ޑިމޮކްރަސީ ކަމަށް އައްޑޫ ސިޓީގެ މޭޔަރު ޢަލީ ނިޒާރު ވިދާޅުވެއްޖެއެވެ.

އިއްޔެ ބޭއްވި އެމްޑީޕީގެ ޗެއާޕާސަން އިންތިޚާބުގައި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީގެ މައްޗަށް އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ކުރި ހޯއްދަވައި އެ އިންތިޚާބު ކާމިޔާބު ކުރަށްވާފައެވެ. އެކަމާ ގުޅިގެން އައްޑޫސިޓީގެ މޭޔަރު ޢަލީ ނިޒާރު ވިދާޅުވީ އިއްޔެގެ ނަތީޖާއިން ފެނިގެން ދިޔައީ އެމްޑީޕީގެ އެތެރޭގެ ވަރުގަދަ ޑިމޮކްރަސީ ކަމަށެވެ. އަދި ކުރިއަށް ދާންވީ މަގު އެމްޑީޕީގެ މެންބަރުން ކޮށައިދީފިކަމަށްވެސް ނިޒާރު ވިދާޅުވިއެވެ.

މޭޔަރު ނިޒާރު ވިދާޅުވީ އެމްޑީޕީ އެއްކޮށް ގުޅިގެން ފައްޔާޒާއެކު ހިންގާލެވޭނެ ކަމަށެވެ.

Feni Saafu vee @MDPSecretariat ge etheryge varugadha democracy. Kuriyah dhaanvee magu MDP ge memberun e vanee koshaa dheefa. Gulhigen hingaaleveyne.
Maruhabaa @faya_i @Roxeyna.

— Ali Nizar (@DhekunuNizar) May 15, 2022

އިއްޔެގެ ޗެއަރޕާސަންގެ އިންތިޚާބުގައި މުޅި އައްޑޫސިޓީން ފައްޔާޒް ވަނީ ކުރި ހޯއްދަވާފައެވެ. އެގޮތުން އެސިޓީން ފައްޔާޒަށް 2587 ވޯޓު ލިބިވަޑައިގެންފައިވެއެވެ. އިންތިއަށް އައްޑޫސިޓީން ލިބިވަޑައިގަތީ 2134 ވޯޓެވެ.

އޭގެ އިތުރުން މުޅިރާއްޖޭގެ ނަތީޖާއިން ފައްޔާޒު އިސްމާއިލް އިންތިޚާބު ކާމިޔާބު ކުރެއްވީ 58 އިންސައްތަ ވޯޓް ހޯއްދަވައިގެންނެެވެ. އިންތިޚާބުގެ ވަގުތީ ނަތީޖާއިން ފައްޔާޒު ވަނީ 28520 ވޯޓު ހޯއްދަވާފައެވެ. އޭނާ އާއި ވާދަކުރި އިންތިއަށް ލިބިލެއްވީ 20855 ވޯޓެެވެ. އެއީ މުޅި ޖުމްލަ ވޯޓުގެ 42 އިންސައްތަ އެވެ.