މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް ހިންގާ ގްރޭޓަރ މާލެ ކަނެކްޓިވިޓީ ބްރިޖު މަޝްރޫޢުގެ ދަށުން، މާލެއާއި ވިލިމާލެއާއި ދެމެދު ހަދާ ސާވޭތައް ނިންމާލައިފިއެވެ.

ހައުސިންގ މިނިސްޓްރީން ބުނީ ބްރިޖު މަޝްރޫޢުގެ ދަށުން މާލެއާއި ވިލިމާލެއާއި ދެމެދު ހަދަންޖެހޭ ސާރވޭގެ މަސައްކަތްތައް މިހާރު ނިމިފައިވާކަމަށާއި މިގޮތުން އެ ސާރވޭގެ ދަށުން، ބޯހޯލް ތޮރުފުމަށް ބޭނުންވާ ސާމްޕަލްވެސް ނަގާފައިވާކަމަށެވެ. އަދި މިހާރު ކުރިއަށްދަނީ ވިލިމާލެއާއި ގުޅީފަޅާއި ދެމެދު ހަދަންޖެހޭ ސާރވޭގެ މަސައްކަތްކަމަށްވެސް މިނިސްޓްރީން ބުނެއެވެ.

މާލެ، ވިލިމާލެ، ގުޅީފަޅު އަދި ތިލަފުށީ ގުޅާލުމަށް ހިންގާ ގްރޭޓަރ މާލެ ކަނެކްޓިވިޓީ ބްރިޖު މަޝްރޫޢު ކުރިއަށްގެންދަނީ އިންޑިއާގެ އެފްކޮން ކުންފުނިންނެވެ. މި ބިޔަ މަޝްރޫޢުގައި އެފްކޮންސް ކުންފުންޏާއެކު އެއްބަސްވެފައި ވަނީ މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށެވެ. މީގެތެރޭގައި ބްރިޖް އަދި ލިންކިން ރޯޑްތައް ހިމެނެއެވެ.

ބްރިޖް މަޝްރޫޢު ފެށުމަށް ހަދަންޖެހޭ ސާރވޭ ހެދުމަށް ގެނެސްފައިވާ ޚާއްޞަ އުޅަނދު ދިރާސާގެ މަސައްކަތްތަކަށް މިހާރު އޮތީ ވިލިމާލެ ކައިރީގައެވެ.

ޕްލޭނިން މިނިސްޓްރީން ބުނީ ބްރިޖުގެ ފައުންޑޭޝަން މަސައްކަތް ޖުލައިމަހު ފެށޭނެކަމަށެވެ. އަދި މިހާރު ބްރިޖު މަޝްރޫޢަށް ބޭނުންވާ މެޝިނަރީތައް ރާއްޖެ ގެނައުމުގެ މަސައްކަތްވެސް ވަރަށް ބާރަށް ކުރިއަށްދާކަމަށްވެސް ޕްލޭނިން މިނިސްޓްރީން ބުނެފައިވެއެވެ.

ބްރިޖު މަޝްރޫޢުގެ މާލެއިން ގުޅިފަޅަށް ގުޅާލާ ބައި ނިންމުމަށް ކަނޑައަޅާފައިވަނީ އަންނަ އަހަރުގެ ޑިސެމްބަރު މަހަށެވެ. އަދި ގުޅީފަޅުން ފެށިގެން ތިލަފުއްޓަށް ނިންމާލެވޭނެކަމަށް ލަފާކޮށްފައިވަނީ 2024ގެ މެއިމަހުގެ ނިޔަލަށެވެ.