ރިސޯޓެއްގެ އިމާރާތެއްގެ ބެލްކަނިން ވެއްޓި ދިވެއްސަކު ނިޔާވެއްޖެއެވެ.

މި ޙާދިސާ ހިނގާފައިވަނީ ރޭ ދަންވަރު ރ. އަތޮޅުގައި ހިންގާ ރިސޯޓެއްގައެވެ. އިންޓަކޮންޓިނެންޓަލް މޯލްޑިވްސް މާމުނާގަ ރިސޯޓުގެ އިމާރާތެއްގެ ހަތަރު ވަނަ ބުރީގެ ބެލްކަނިން ވެއްޓި ނިޔާވެފައިވަނީ ފުވައްމުލަކު ދަޑިމަގު އަވަށު ޒައިދު އިބްރާހިމް ނަމަކަށް ކިޔާ 28 އަހަރުގެ ޒުވާނެކެވެ.

ޙާދިސާ ހިނގުމާއެކު އޭނާގެ ހަށިގަނޑު ރޭ ދަންވަރު 1:50 ހާއިރުވަނީ ރ. އުނގޫފާރު ހޮސްޕިޓަލަށް ގެންގޮސްފައެވެ. މި ޙާދިސާގައި އޭގެ ހަށިގަނޑުގެ ބޭރުފުށަށް ލިބިފައިވާ ޒަޚަމްތަކުގެ ތަފްސީލް އެއްވެސް ފަރާތަކުން ހާމަކޮށްފައެއް ނުވެއެވެ. އޭނާގެ ހަށިގަނޑު މިއަދު ހެނދުނު 6:15 ގައި ވަނީ މާލެ ގެނެސްފައެވެ.

ފުލުހުން ބުނީ، މިހާދިސާގެ މައުލޫމަތު ލިބިފައިވަނީ ރޭ 12:49 ހާއިރު ކަމަށާއި އުނގޫފާރު ހޮސްޕިޓަލަށް އޭނާ ގެންދިޔަ އިރުވެސް ނިޔާވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށެވެ.

މިހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށްވެސް ފުލުހުން ވަނީ ބުނެފައެވެ.