މިމަހުގެ 14 ވަނަ ދުވަހު ބޭއްވި އެމްޑީޕީގެ އެތެރޭގެ އިންތިޚާބުގެ ދާއިމީ ނަތީޖާ އިޢުލާނުކޮށްފިއެވެ.

ދިވެހިރައްޔިތުންގެ ޑިމޮކްރެޓިކް ޕާޓީ، އެމްޑީޕީގެ އެތެރޭގެ އިންތިހާބު ބޭއްވީ ޗެއާޕާސަންގެ އިތުރުން، އަންހެނުންގެ ރޫޙާއި ޒުވާނުންގެ ހިތްވަރުގެ ރައީސް އާއި ނައިބު ރައީސް ހޮވުމަށެވެ. އިންތިޚާބުގެ ދާއިމީ ނަތީޖާ އެމްޑީޕީން މިހާރު ޢާއްމުކޮށްފައިވާއިރު، އިންތިޚާބުގައި ވޯޓުލާފައިވަނީ ޖުމްލަ 49،239 މީހުންނެވެ. ސައްހަ ވޯޓުގެ އަދަދަކީ 48،266 އެވެ. އަދި ބާތިލް ވޯޓުގެ އަދަދަކީ 973 އެވެ. މި އިންތިޚާބުގައި ނުވަދިހަ ހަތަރުހާހަށްވުރެ ގިނަ މީހުންނަށް ވޯޓުލުމުގެ ޙައްޤު ލިބިފައިވާކަމަށް އެމްޑީޕީން ވަނީ ބުނެފައެވެ.

އެމްޑީޕީގެ ޗެއާޕާސަން އިންތިޚާބުގައި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީގެ މައްޗަށް އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ކުރި ހޯއްދަވައި އެ އިންތިޚާބު ކާމިޔާބު ކުރަށްވާފައެވެ. ފައްޔާޒު އިސްމާއިލް އިންތިޚާބު ކާމިޔާބު ކުރެއްވީ 58 އިންސައްތަ ވޯޓް ހޯއްދަވައިގެންނެެވެ. އިންތިޚާބުގެ ދާއިމީ ނަތީޖާއިން ފައްޔާޒު ވަނީ 27،841 ވޯޓު ހޯއްދަވާފައެވެ. އޭނާ އާއި ވާދަކުރި އިންތިއަށް ލިބިލެއްވީ 20،425 ވޯޓެެވެ. އެއީ މުޅި ޖުމްލަ ވޯޓުގެ 42 އިންސައްތަ އެވެ.

މި އިންތިޚާބުގައި ސަފާތު އަހްމަދު ޒާހިރާއި ވާދަކޮށް، އެ ޕާޓީގެ އަންހެނުންގެ ރޫހުގެ ރައީސް ކަމަށް އިންތިހާބުވެފައިވަނީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމެވެ. ރޮޒައިނާއަށް 11،921 ވޯޓު ލިބިފައިވާއިރު ސަފާތަށް ލިބުނީ 7،912 ވޯޓެވެ. ޒުވާނުންގެ ހިތްވަރުގެ ރައީސަކަށް އިންތިހާބުވީ ރިފްގާ ޝިހާމެވެ.

އެމްޑީޕީގެ އެތެރޭގެ އިންތިޚާބަށްފަހު އެމްޑީޕީގެ ރައީސް، ރައީސް މުޙައްމަދު ނަޝީދު ވަނީ ފައްޔާޒް ހޯއްދެވި ކާމިޔާބީ ފާހަގަކުރަށްވައި، މަރުހަބާ ވިދާޅުވެފައެވެ. އެމަނިކުފާނުގެ މެސެޖުގައި ވަނީ ފަޔާއާއި ފަޔާގެ ކެމްޕޭން ޓީމަށާއި އަދި އިންތިއާއި އިންތިގެ ކެމްޕޭން ޓީމަށްވެސް ވަރަށް ބޮޑަށް މަރުހަބާ ވިދާޅުވެފައެވެ. އަދި ފަޔާގެ ޗެއަރޕާސަންކަމުގައި އެމްޑީޕީއަށް އިތުރު ކާމިޔާބީ ހޯދޭނެކަމާމެދު އެމަނިކުފާނުގެ ހިތްޕުޅުގައި ޝައްކު ނުހިނގާކަމަށް ވިދާޅުވިއެވެ.