6 މޭގެ ބޮމުގެ ހަމަލާއާ ގުޅިގެން މިއަދު ބާއްވަން ތާވަލުކުރި ޝަރީއަތުގެ އަޑުއެހުން ކެންސަލްކޮށްފިއެވެ.

މިދިޔަ އަހަރުގެ މޭމަހު 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދުއަށް އަމާޒުކޮށް ދިން ބޮމުގެ ހަމަލާއާ ގުޅިގެން 10 މީހެއްގެ ޝަރީއަތް ކްރިމިނަލް ކޯޓުގައި ދަނީ ކުރިއަށެވެ.

މިއަދުގެ އަޑުއެހުން ތާވަލުކުރީ ހަމަލާއާ ގުޅޭ ދައުވާތައް އުފުލި ތަހްނީމް އަހުމަދާއި މުޖާޒު އަހުމަދާއި އިސްހާގު އާއި ފަހުމީ އަލީ އާއި އަލީ ހައިޝަމް އާއި ފަހުމީ އަލީ އާއި މުހައްމަދު ނާޒިމް އަދި އިސްހާގުގެ މައްޗަށް ޝަރީއަތް ހިންގުމަށެވެ.

ކްރިމިނަލް ކޯޓުން ބުނި މިއަދު ހެނދުނު 9:00 އަށް ތާވަލުކުރި އަޑުއެހުން ކެންސަލްކުރީ ޖަލުގައި ތިބި ދައުވާ ލިބޭ މީހުން ކަނޑުގަދަވެ ދަތުރުކުރުމަށް ދަތިވުމުން ކޯޓަށް ހާޒިރު ނުކުރެވިގެނެވެ. އަދި މިއަދު ކެންސަލްވި އަޑުއެހުން ހޮނިހިރު ދުވަހު ބޭއްވުމަށް މަސައްކަތް ކުރަމުންދާކަމަށް ކޯޓުން ވަނީ ބުނެފައެވެ.



ރައީސް ނަޝީދަށް ދިން ބޮމުގެ ހަމަލާއާ ގުޅިގެން މިހާތަނަށް ކުށް ސާބިތު، ހުކުމް އިއްވާފައިވަނީ، ބޮން ގޮއްވާލި އަދުހަމް ރަޝީދަށް އެކަންޏެވެ. އެނާގެ މައްސަލަ އަވަހަށް ނިމުނީ، އޭނާ ކުށަށް އިއުތިރާފްވެ، ދައުލަތާއެކު އެއްބަސްވުމެއް ގާއިމްކުރުމުންނެވެ.



ބޮމުގެ ހަމަލާގެ ޝަރީއަތްތައް ކުރިއަށްދާއިރު، ޝަރީއަތް އޮބްޒާވް ކުރުމުގެ ފުރުސަތު ރައީސް ނަޝީދުގެ ވަކީލުންނަށް ކްރިމިނަލް ކޯޓުން ވަނީ ދެއްވާފައެވެ.