ނިމިދިޔަ މޭމަހު މީރާއަށް ބަލައިގަތް އާމްދަނީ މިދިޔަ އަހަރުގެ މެއިމަހާ އަޅާބަލާއިރު 63 އިންސައްތަ އިތުރުވެއްޖެއެވެ.

މޯލްޑިވްސް އިންލަންޑް ރެވެނިއު އޮތޯރިޓީ، މީރާގެ ތަފާސް ހިސާބުތައް ދައްކާގޮތުން މިދިޔަ މެއިމަހު މީރާއަށް ވަނީ 1.28 ބިލިއަން ރުފިޔާ އާމްދަނީގެ ގޮތުގައި ބަލައިގެންފައެވެ. މިއީ މީރާއަށް ލިބޭނެކަމަށް އަންދާޒާކޮށްފައިވާ އާމްދަނީއަށްވުރެ 12.8 އިންސައްތަ އިތުރު އަދަދެކެވެ. އަދި މިއީ މިދިޔަ އަހަރުގެ މެއިމަހު މީރާއަށް ބަލައިގަތް އާމްދަނީއާ އަޅާބަލާއިރު 63 އިންސައްތަ އިތުރު އަދަދެކެވެ.

މެއިމަހު މީރާއަށް ބަލައިގަތް އާމްދަނީ އިތުރުވި މައިގަނޑު ސަބަބަކީ ދިވެހިރާއްޖެއަށް ޒިޔާރާތްކުރި ފަތުރުވެރިންގެ އަދަދު އިތުރުވުމާއެކު، ޓޫރިޒަމް ދާއިރާއާ ގުޅުންހުރި ޓެކްސްތަކުން ލިބިފައިވާ އާމްދަނީ އިތުރުވުމާއި، އެއަރޕޯޓް ޓެކުހާއި ފީ ނެގުމުގެ ޤާނޫނަށް ގެނައި އިސްލާހާއެކު ލިބުނު އާމްދަނީ އިތުރުވުމެވެ.

މެއި 2022ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީއެވެ. އެއީ 64.7 އިންސައްތަ ނުވަތަ 829.4 މިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ 105.5 މިލިއަން ރުފިޔާއާއެކު އިންކަމް ޓެކުހުންނެވެ.

ހުސްވި މަހު މީރާއަށް ބަލައިގަތް އެހެން އާމްދަނީތަކަށް ބަލާއިރު ގްރީން ޓެކްސްގެ ގޮތުގައި 96.5 މިލިއަން ރުފިޔާ އެއަރޕޯޓް ޑިވެލޮޕްމަންޓް ފީގެ ގޮތުގައި 60.6 މިލިއަން ރުފިޔާ އަދި ޑިޕާޗަރ ޓެކްސްގެ ގޮތުގައި 59.8 މިލިއަން ރުފިޔާ ލިބިފައިވެއެވެ.

މޭއި 2022 ގައި ބަލައިގަނެފައިވާ އާމްދަނީގެ ތެރޭގައި 53.4 މިލިއަން އެމެރިކާ ޑޮލަރުވެސް ހިމެނެއެވެ.