ހަތަރު އަންހެން ދަރިން ސްކޫލް ނުފޮނުވި ބައްޕަ 1 އަހަރާއި ހަތަރު މަހަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

ކްރިމިނަލް ކޯޓުން އިއްޔެ ނިންމާފައިވާ މައްސަލައިގައި އަޙްމަދު ނިޔާޒް ކިޔާ މީހެއްގެ މައްޗަށް ޙުކުމް ކޮށްފައިވަނީ އުމުރުން 20 އަހަރުގެ ކުއްޖަކާއި އުމުރުން 17 އަހަރުގެ ކުއްޖަކާއި އުމުރުން 16 އަހަރުގެ ކުއްޖަކާއި އުމުރުން 12 އަހަރުގެ ކުއްޖެއް ސްކޫލަށް ނުފޮނުވައި އުނގެނުމުގެ ޙައްޤުން މަޙުރޫމްކޮށްފައިވާތީއެވެ. އަދި އޭނާވަނީ އޭނާގެ 20 އަހަރުގެ ދަރިފުޅުގެ ކައިވެނިވެސް އަމިއްލައަށް ކޮށްދީފައެވެ.

ދަޢުލަތުން އޭނާގެ މައްޗަށް ކޮށްފައިވަނީ ޤާނޫނު ހިންގަން ހުރަސް އެޅުމުގެ ދައުވާ އާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާ އެވެ.

މި މައްސަލަތަކުގެ ޝަރީޢަތުގައި އަޙްމަދު ނިޔާޒް ބުނެފައިވަނީ ކުދިން ސްކޫލަށް ނުފޮނުވުމަކީ ކުށެއްކަން އޭނާއަށް ނޭނގޭ ކަމަށާއި ނަމަވެސް ސްކޫލް މާޙައުލުގައި އިސްލާމްދީނާއި ބީރައްޓެހި ޢަމަލުތަކެއް ހިންގަމުންދާތީ އެކަންތައްތައް އިސްލާޙު ކުރުމަށް އެދިފައިވާނެ ކަމަށެވެ. ނަމަވެސް އެކަމަށް ޙައްލެއް ނުލިބުމުން ދަރިން ސްކޫލަށް ފޮނުވުން ހުއްޓާލަން ޖެހުނުކަމަށް ނިޔާޒް ވަނީ ބުނެފައެވެ.

އޭގެ އިތުރުން ދަރިފުޅުގެ ކައިވެނި އޭނާ އަމިއްލައަށް ކޮށްދިނީ އެކަން މަނާކުރާނެ ދަލީލެއް ފެންނަން ނެތުމުން ކަމަށާއި އެއީ ދީނީ ގޮތުން ކުރެވޭނެ ކަމެއް ކަމަށް ވެސް ކޯޓުގައި ނިޔާޒް ވަނީ ބުނެފައެވެ.

މައްސަލާގައި ކްރިމިނަލް ކޯޓުން އިއްވި ޙުކުމުގައި ވަނީ ދީނީ ވިސްނުމަކީ ބަހަނާއަކަށް ހަދައިގެން ޤާނޫނު ހިންގުމަށް އަޙްމަދު ނިޔާޒް ހުރަސްއަޅާފައިވާ ކަމަށާއި ނިޔާޒަކީ ދީނީ ތަޢުލީމުދޭ މަރުކަޒަކުން ދީނީ ތަޢުލީމް ޙާސިލުކޮށްފައިވާ މީހެއްކަން އެނގެން ނެތް ކަމަށެވެ. އެހެންކަމުން ރާއްޖޭގެ ތަޢުލީމީ ނިޒާމާމެދު ޙުކުމް ބަޔާންކޮށް ފަތުވާދިނުމަކީ ޤާނޫނީ ގޮތުންނާއި ޝަރުޢީގޮތުން ނިޔާޒަށް އޮތް ޙައިސިއްޔަތެއް ނޫން ކަމަށްވެސް ޙުކުމުގައިވެއެވެ.

އަދި ޢިލްމާއި ތަޢުލީމްގެ މިޒަމާނުގައި މިއީ އަންހެންދަރިން ދިރިހުއްޓާ ވަޅުލުންފަދަ ކަމެއްކަމަށް ޙުކުމުގައިވެއެވެ. ދަރިން ސްކޫލަށް ނުފޮނުވި މައްސަލައިގެ ވަށައިގެންވާ ކަންކަމަށް ބެލުމަށް ފަހު، ޤާޟީ ޢަލީ ނަދީމް ނިންމެވީ ގެއްލިގެންދިޔަ ދަރިންގެ މުސްތަގްބަލާއި ތައުލީމާއި ތަރުބިއްޔަތަކީ އަނބުރާ ހޯދައިގަނެވޭނެ ކަމަކަށް ނުވާތީ ގާނޫނު ހިންގަން ހުރަސް އެޅުމުގެ ކުށަށް ދެވެން އޮތް އެންމެ ބޮޑު އަދަބެއް އަޙްމަދު ނިޔާޒަށް ދިނުމަށެވެ. އެގޮތުން އެއް އަހަރަށް ޖަލަށްލުމަށް ކޯޓުންވަނީ ޙުކުމްކޮށްފައެވެ.

އޭގެ އިތުރުން ހުއްދަ ނެތި ކައިވެނިކޮށްދިނުމުގެ ކުށުގައި ހަތަރު މަހާއި 24 ދުވަހަށް ޖަލަށްލާން ހުކުމްކުރިޔަސް، އޭނާ ބަންދުގައި ހޭދަކުރި މުއްދަތު ހުކުމުގެ މުއްދަތުން އުނިކުރުމުން ތަންފީޒު ކުރަންޖެހޭނީ ތިން މަހާއި 20 ދުވަހެވެ. އެހެންކަމުން ދެ ހުކުމް އެއްކޮށް އޭނާ ތަންފީޒު ކުރަން ޖެހޭނީ އެއް އަހަރާއި ތިން މަހާއި 20 ދުވަހުގެ ޖަލު ޙުކުމެކެވެ.