ބިދޭސީއެއްގެ އަތުން ފޭރުނު ތިންމީހަކު ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.

ފޭރުމުގެ މިމައްސަލާގައި މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ ދަޢުލަތުން އުފުލީ ހ. ލާމިޔާ، ފާތިމަތު ނަޝާޔާ އާއި އއ. ތޮއްޑޫ، ހުދުފިިނިފެންމާގޭ، ހަދީޖާ ޝައިމާ އަލީ އާއި ތ. ތިމަރަފުށި، އަނބުގަސްދޮށުގެ، އަހްމަދު ހައިސަމްގެ މައްޗަށެވެ.

ދައުލަތުން ކުރި ދައުވާގައި ބުނީ، މައްސަލައިގެ ތުހުމަތުކުރާ 3 މީހުން ބަންގްލަދޭޝްގެ ރައްޔިތެއް ކަމަށްވާ ރޮބެލް މިއާ ދިރިއުޅޭ ގެއަށް އޭނާއާއެކު 2018 ވަނަ އަހަރު ވަދެ، އޭނާގެ އަތުން 3،335 އެމެރިކާ ޑޮލަރު (51259 ރުފިޔާ) އާއި 20،995 ރުފިޔާ އާއި ސެމްސަންގު އަށެއް ޕްލަސް ފޯނެއް ފޭރިގެންފައިވާ ކަމަށެވެ.

އެ މައްސަލައިގެ ޝަރީޢަތުގެ މަރުޙަލާގައި 3 މީހުންވެސް ވަނީ ކުށަށް އިއުތިރާފް ވެފަ އެވެ. ގާނޫނުލް އުގޫބާތުގައި އެ ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހަށް ޖަލަށް ލުމެވެ. ނަމަވެސް ދެ އަންހެނުން އޭގެފަހުން ކުށެއް ކޮށްފަ ނުވުމުންނާއި، އެއީ އެފަދަ ފުރަތަމަ ކުށް ކަމަށްވުމުންނާއި، ދެމީހުންގެ ދިރިއުޅުމުގެ ހާލަތަށް ބަލައި އެ ކުށުގެ އަދަބު ތިން ތަރަޖައަށް ދަށްކޮށްދިނުމަށް ޤާޟީ ނިންމެވިއެވެ.

އެގޮތުން ދެ އަންހެނުން ތަންފީޒު ކުރަން ޖެހޭ އަބަދުގެ ބާވަތަށް ބަދަލު ގެނެސް ޤާޟީ ސޮފްވަތު ހަބީބު ހުކުމް ކުރީ ހަތަރު މަހާއި 24 ދުވަހަށް ޖަލަށް ލުުމާއި، 24،000 ރުފިޔާއިން ޖޫރިމަނާ ކުރުމުގެ އިތުރަށް 96 ގަޑިއިރަށް މުޖުތަމައަށް ހިދުމަތް ކުރަން ނުކުތުމަށެވެ. އަދި ކޮންމެ މީހަކުވެސް ހަތަރު މަސް ދުވަހުގެ ތެރޭގައި މީރާއަށް ފައިސާދެއްކުމަށް ޙުކުމްގައި އަންގާފައިވެއެވެ.

މި މައްސަލާގައި ދައުވާ ކޮށްފައިވާ ފިރިހެން މީހާއަށް އިއްވީ އެއް އަހަރާއި ހަ ދުވަހުގެ މުއްދަތުގެ ޖަލުޙުކުމެކެވެ.