އައްޑޫސިޓީގައި ނުކުޅެދުންތެރިކަން ހުންނަ އަންހެނަކު ރޭޕްކުރި ދެމީހަކު 15 އަހަރަށް ޖަލަށްލުމަށް ހުކުމްކޮށްފިއެވެ.

ޕްރޮސެކިއުޓަރ ޖެނެރަލްގެ އޮފީހުން ބުނީ އައްޑޫސިޓީ ހިތަދޫގައި ނަފްސާނީ ގޮތުން ނުކުޅުދުންތެރިކަމެއް ހުންނަ އަންހެނަކަށް ޖިންސީ އަދި ޖިސްމާނީ އަނިޔާކޮށް އޭނާއާމެދު ގަދަކަމުން ބަދުއަޙްލާޤީ ޢަމަލު ހިންގި މައްސަލާގައި ދެ މީހަކަށް ޙުކުމް ކޮށްފައިވާ ކަމަށެވެ. މި ޢަމަލު ހިންގާފައިވަނީ 31 ޖުލައި 2020 ދުވަހުގެ ފަތިހުގެ ވަގުތެއްގައެވެ.

މި މައްސަލާގައި 15 އަހަރުގެ ޖަލު ޙުކުމެއް އިއްވާފައިވަނީ ކ. މާލެ، ދަފްތަރު ނަންބަރު 963، މަޚްތޫމް މޫސާ ދީދީއާއި، ސ. ހިތަދޫ، ޒަހާމަންޒިލް، ޢަލީ ޝިމާޢު ޒުބައިރުގެ މައްޗަށެވެ.

ޖިންސީ ކުށުގެ ޤާނޫނުގެ ދަށުން ސ. ހިތަދޫ މެޖިސްޓްރޭޓް ކޯޓަށް ހުށަހެޅި، ނުކުޅުދުންތެރިކަމެއް ހުރި މީހަކާ އެކު ޖިންސީ އަމަލު ހިންގުމުގެ ކުށުގެ ދަޢުވާ ސާބިތުވެއްޖެކަމަށް ކަނޑައަޅައި ޖިންސީ ކުށުގެ ޤާނޫނުގެ 28 ވަނަ މާއްދާގެ (ނ) ގެ ދަށުން، މި ދެމީހުން 15 އަހަރަށް ޖަލަށްލުމަށް ހުކުމް ކުރީ ޖޫން މަހުގެ 30 ވަނަ ދުވަހުއެވެ.

މި މައްސަލާގައި މީގެ ކުރިން ފުލުހުން ޢާއްމުކޮށްފައިވާ މަޢުލޫމާތުގައި ބުނެފައިވަނީ އައްޑޫސިޓީގައި 30 އަހަރުގެ މީހަކާއި 19 އަހަރުގެ މީހަކު ބައިވެރިވެގެން ނުކުޅެދުންތެރިކަން ހުންނަ 48 އަހަރުގެ އަންހެނަކު ރޭޕް ކޮށްފައިވާ ކަމަށެވެ. އެހާދިސާ އާއި ގުޅިގެން އަންހެން މީހާއަށް ހޮސްޕިޓަލްގައި އެނދުމަތިކޮށްގެން ފަރުވާ ދޭން ޖެހުނެވެ.