ށ. ފޭދޫގައި އަނބިމީހާގެ ބަނޑަށް ވަޅިހެރި މީހާގެ މައްޗަށް ދަޢުވާކޮށްފިއެވެ.

ފުލުހުން މީގެކުރިން ބުނެފައިވަނީ ށ. ފޭދޫ ދެމަފިރިއެއްގެ ދެމެދުގައި ހިނގި ހަމަނުޖެހުމެއްގައި އަނބިމީހާ ގަޔަށް ވަޅި ޖަހާފައިވާ ކަމުގެ މައުލޫމާތު މިދިޔަ ޖޫންމަހުގެ 2 ވަނަ ދުވަހުގެރޭ ނުވަގަޑިބައި ހާއިރު ފުލުހުންނަށް ލިބުނު ކަމަށެވެ. އަދި އެ މައްސަލައާ ގުޅިގެން 37 އަހަރުގެ ފިރިހެނަކު ފުލުހުން ހައްޔަރުކުރިއެވެ.

އެމައްސަލައިގެ އިތުރު ތަފްސީލް ހާމަކޮށް ޕްރޮސިކިއުޓަރ ޖެނެރަލްގެ އޮފީހުން މިއަދު ބުނީ ށ. ފޭދޫ ރެޑިއަމްގެ، އާދަމް، މިދިޔަ ޖޫން މަހުގެ 2 ވަނަ ދުވަހުގެރޭ 21:18 ހާއިރު ށ. ފޭދޫ ރެޑިއަމް ގޭގައި އޭނާގެ އަނބިމީހާއަށް އަނިޔާކޮށް ތޫނު ވަޅިއަކުން ހަމަލާދީ ޒަހަމް ކޮށްލާފައިވާ މައްސަލައިގައި ދަޢުވާ އުފުލާފައިވާ ކަމަށެވެ.

އާދަމްގެ މައްޗަށް އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ގެ 9 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ށ) ގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާއެވެ.

ށ. ފޭދޫ މެޖިސްޓްރޭޓް ކޯޓަށް މި ދަޢުވާ ހުށަހަޅާފައިވަނީ މިދިޔަ ޖޫން މަހުގެ 30 ވަނަ ދުވަހުކަމަށް ޕީޖީ އޮފީހުން ވަނީ ބުނެފައެވެ. އެ ކުށް ސާބިތުވެއްޖެ ނަމަ، އާދަމްގެ މައްޗަށް ހަތް އަހަރާއި 10 އަހަރާ ދެމެދުގެ ޖަލު އަދަބެއް އަންނާނެ އެވެ.

ފޭދޫ ކައުންސިލްގެ ރައީސް އަހުމަދު ރައިސަމާއި ޙަވާލާދީ ބައެއް މީޑިއާތަކުން މީގެ ކުރިން ބުނެފައިވަނީ، މިދިޔަ ޖޫންމަހުގެ 2 ވަނަ ދުވަހުގެރޭ ނުވަގަޑިބައި ހާއިރު ފިރިހެން މީހާގެ މަންމަގެ އެދުމަށް އެގެއަށް ދިޔައިރު އަންހެން މީހާ ގޭގެ ފުރަގަހަށް ގެންގޮސް ފިރިހެން މީހާ އަނިޔާ ކުރަމުންދިޔަ ކަމަށެވެ.

އެ ގޭގެ ފުރަގަހަށް ދިޔައިރު އަންހެން މީހާގެ ގަޔަށް ވަޅި ޖަހާފައިވާކަމަށް ކައުންސިލްގެ ރައީސްއާއި ޙަވާލާދީ މީޑިއާތަކުން ރިޕޯޓްކޮށްފައިވެއެވެ. ވަޅި ހަރާފައިވަނީ އޭނާގެ ބަނޑަށެވެ.