މިއަހަރުގެ ބަޖެޓް ފާސްކުރިއިރު ލަފާކުރިވަރަށްވުރެ ބަޖެޓް ޑެފިސިޓް މިއަހަރު ނިމޭއިރު އިތުރުވާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ނޫސްވެރިންނާއި ބައްދަލުކުރައްވާ ވާހަކަފުޅުދައްކަވަމުން އަމީރު ވަނީ ރާއްޖޭގެ އިޤްތިޞާދީ ހާލަތު އޮތްގޮތާއި އިޤްތިޞާދު އާރާސްތުކުރަން ކުރަމުންދާ މަސައްކަތުގެ މައުލޫމާތު ނޫސްވެރިންނާއި ހިއްސާކުރައްވާފައެވެ.

އަމީރުގެ ވާހަކަފުޅުގައި ވިދާޅުވީ މިއަހަރުގެ ބަޖެޓުގައި އާމްދަނީ އާއި ހިލޭ އެހީގެ ގޮތުގައި ލިބޭނެކަމަށް އަންދާޒާ ކުރި މިންވަރަށް އަހަރުގެ ތެރޭގައި އާމްދަނީ ލިބޭނެކަމަށެވެ. އަދި ޓެކުހުގެ ގޮތުގައި ލިބޭނެކަމަށް ލަފާކުރި އާމްދަނީވެސް ލިބޭނެކަމަށް އަމީރު ވިދާޅުވިއެވެ. ނަމަވެސް ހިލޭ އެހީއާއި އަލަށް ދައުލަތަށް ލިބޭނެކަމަށް ލަފާކުރި އާމްދަނީގެ އަދަދުތަކާއި އެއްވަރަށް އެ އާމްދަނީ ނުލިބޭނެކަމަށް މިހާރު ފެންނަކަމަށް އަމީރު ވިދާޅުވިއެވެ.

އަމީރު ވިދާޅުވީ ހަަރަދުތައް ހިނގަމުންދާ ގޮތަށް ބަލާއިރު، ރިކަރަންޓް ހަރަދާއި ކެޕިޓަލް ހަރަދުތައްވެސް ހިނގަމުންދަނީ މިދިޔަ އަހަރަށްވުރެ ބާރަށްކަމަށެވެ. އެގޮތުން ރިކަރަންޓް ހަރަދުގެ ތެރެއިން އެންމެ ބާރަށް އިތުރުވަމުންދަނީ ސަބްސިޑީއަށް ކުރާ ހަރަދުކަމަށްވެސް އަމީރު ވިދާޅުވިއެވެ. މީގެއިތުރުން މަޝްރޫއުތަކަށް ހިނގާ ހަރަދު ބާރަށް ކުރިއަށްދާއިރު ސަރުކާރު ކުންފުނިތަކަށް ކެޕިޓަލް ދޫކުރުމަށް ހިނގާ ހަރަދު އިތުރުވާނެކަމަށް ބެލެވޭކަމަށްވެސް އަމީރު ވިދާޅުވިއެވެ.

މިކަންކަމުގެ ސަބަބުން އަހަރުގެ ނިޔަލަށް ޕާސްކުރި މިންވަރާއި އަޅާބަލާއިރު ޑެފިސިޓް އިތުރުވާނެކަމަށް ބެލެވޭކަމަށް ފިނޭންސް މިނިސްޓަރ ވިދާޅުވިއެވެ.

އަމީރު ވިދާޅުވީ ކޯވިޑްގެ ތެރޭގައި ރާއްޖޭގެ އިޤްތިޞާދު ފަހުގެ ތާރީހެއްގައި ހީނަރުވެގެން ނުދާ މިންވަރަށް ހީނަރުވެފައިވާކަމަށެވެ. އެގޮތުން 2020 ވަނަ އަހަރު ރާއްޖޭގެ އިޤްތިސާދުގެ ތިންބައިކުޅަ އެއްބައި މަދުވިކަން އަމީރު ފާހަގަކުރެއްވިއެވެ.

އަމީރު ވިދާޅުވީ ބަޖެޓް ޑެފިސިޓް އިތުުރުވިނަމަވެސް ރާއްޖޭގެ އިޤްތިޞާދީ ހާލަތު ކޯވިޑްގެ ކުރިން އޮތް ހިސާބަށް ގެންދެވޭނެކަމަށެވެ. އަދި މިއަހަރު ރާއްޖޭގެ އިޤްތިޞާދު 12 ޕަސަންޓާއި 16 ޕަސަންޓާއި ދެމެދުގެ އަދަދަކުން ކުރިއަރާނެކަމަށްވެސް އަމީރު ވިދާޅުވިއެވެ.