ނ. ހެނބަދޫން ގެއްލިގެން ހޯދަމުން ދާ ޒުވާނާ އަދިވެސް ނުފެންނަ ކަމަށް އެ ރަށު ކައުންސިލުން ބުނެފިއެވެ.

ހެނބަދޫން ގެއްލިގެން ހޯދަމުންދަނީ އެރަށު ކުންނާރުމާގޭ އިބްރާހިމް ރާމިޒް ނަމަކަށް ކިޔާ މީހެކެވެ. ރާމިޒް އެންމެ ފަހުން ފެނިފައިވަނީ އިއްޔެ ހެނދުނު 8:00 ހާއިރު އެރަށު ބަނދަރު ސަރަހައްދުން ކަމަށާއި އެވަގުތު އޭނާ ލައިގެން ހުރީ ހުދު ޓީޝާޓަކާއި ނޫ ކުލައިގެ ފަޓުލޫނެއް ކަމަށް ކައުންސިލުން މަޢުލޫމާތުދެއެވެ. އޭގެފަހުން އޭނާގެ ހަބަރެއް ވެފައެއް ނުވެއެވެ.

ހެންބަދޫ ކައުންސިލުން ރާއްޖޭގެ ބައެއް މީޑިއާތަކަށް މަޢުލޫމާތު ދެމުން ބުނެފައިވަނީ ރާމިޒް ގެއްލުނު ކަމުގެ ރިޕޯޓް ލިބުނު ވަގުތުން ފެށިގެން އޭނާ ހޯދުމުގެ މަސައްކަތް އެރަށު ރައްޔިތުން ކުރަމުންދާ ކަމަށާއި ނަމަވެސް އަދިވެސް އޭނާގެ ޚަބަރެއް ނުވާކަމަށެވެ.

ރާމިޒު ހޯދުމުގެ މަސައްކަތް ކުރަމުން ދަނިކޮށް ހެނބަދޫ ގޮނޑުދޮށުގައި އޮތް ކެނޯއެއް ބާލާފައިވާކަން ފާހަގަ ވެފައިވާތީ އޭނާ ހޯދުމުގެ މަސައްކަތް ކަނޑުމަތީގައިވެސް ކުރަމުން އަންނަ ކަމަށް ކައުންސިލުންވަނީ ބުނެފައެވެ.

ރާމިޒަކީ މީގެ ކުރީން ޢާމްދަނީ ހޯދުމަށް ރަށުން ބޭރުގައި މަސައްކަތް ކުރަމުންއައި މީހެކެވެ. އޭނާ އެނބުރި ރަށަށް ގޮސްފައިވަނީ މީގެ ދެތިން ދުވަސް ކުރިންނެވެ.

ރާމިޒާއި ބެހޭ އެއްވެސް މައުލޫމާތެއް ލިބިފައިވާނަމަ ލަސްނުކޮށް އެމައުލޫމާތެއް ފުލުހުންގެ ހޮޓްލައިން ނަމްބަރު 3322111 އަށް ނުވަތަ ނ. މަނަދޫ ޕޮލިސްގެ ނަންބަރު 9792039 އަށް ގުޅާ ހިއްސާ ކޮށްދިނުމަށް ނ. އަތޮޅު ކައުންސިލުން ވަނީ އެދިފައެވެ.