އާމްދަނީ އިތުރުނުވާނަމަ ތަރައްޤީ ވާނީ ބުރައަކަށް ކަމަށް ޤާނޫނު އަސާސީ އިސްލާޙުކުރި ރައްޔިތުންގެ ޚާއްސަ މަޖިލީހުގެ މެމްބަރު ނަފާ ނަސީމް ވިދާޅުވެއްޖެއެވެ.

އެމްޓީސީސީގެ ކުރީގެ މެނޭޖިން ޑިރެކްޓަރު ނަފާ ނަސީމް މިއަދު ވިދާޅުވީ ތަރައްގީގެ ދުވެއްޔަށްވުރެ ތަރައްގީ ގެ އަމާޒު މާ މުހިއްމު ކަމަށެވެ. ހަމައެއާއެކު އާމްދަނީ އިތުރުނުވާނަމަ ތަރައްގީ ވާނީ ބުރައަކަށް ކަމަށްވެސް ނަސީމް ވިދާޅުވިއެވެ.

"ފުލެޓު ލިބުނަސް ލޯނުނުދެއްކޭ ނަމަ ދެއްކިލާރިއާ ފުލެޓުވެސް ގެއްލޭނެއެވެ! މިސްކިތް އޭސީކުރިއަސް ބިލްނުދެއްކޭ ނަމަ ފިނިވާނެތޯއެވެ؟" ނަސީމް މިސާލު ޖައްސަވާފައިވެއެވެ.

އިގްތިސާދީ ތަޖުރިބާކާރެއް ކަމަށްވާ ނަފާ ނަސީމް ވިދާޅުވީ ރާއްޖޭގައި ކޮންމެ ކަމަކީވެސް މޫސުމީ ކަމެއް ކަމަށެވެ. އެގޮތުން، ނުރައްކާތެރި އެކްސިޑެންޓެއްވެ ހިތާމަތަކެއް ދިމާވުމުން ގާނޫނުގެ މަތިން އެންމެންވެސް ހަނދާންވެ ފާޑުކިޔާ ކަމަށެވެ. ނަމަވެސް ދުވަސްކޮޅެއް ފަހުން ޤާނޫނަށް ބޯލަނބަން ހަނދާނުގައި ނުހުންނަ ކަމަށް ނަސީމް ވިދާޅުވިއެވެ.

"ވީގޮތާ ވާންވީގޮތް ކިޔާދެއެވެ. ޒިންމާވެރިން ކުށްވެރިވެއެވެ. އެކަމަކު ދެން ވެސް ގާނޫނަށް ކިޔަމަންވުމެއް ނޯވެއެވެ." ނަސީމް ވިދާޅުވެފައިވެއެވެ.