ބޮޑުތަކުރުފާނު މަގުން އެކުވެނި ކައިރީގައި ހިނގި ނުރައްކާތެރި އެކްސިޑެންޓްގައި އަނިޔާވެގެން ފަރުވާ ދެމުންދާ 4 މީހުންގެ ތެރެއިން އެކަކު ވޯޑަށް ބަދަލުކޮށްފިއެވެ.

ކާރެއް ކޮންޓްރޯލްނުވެގެން މިމަހުގެ 4 ވަނަ ދުވަހު ހިނގި މި އެކްސިޑެންޓްގައި 6 މީހަކު ޒަހަމްވިއިރު އެކަކު ވަނީ ނިޔާވެފައެވެ. ނިޔާވެފައިވަނީ ގއ. މާމެންދޫ، ބިލަތްމާގޭ، މަރްޔަމް އަމާނީ ރަޝީދު، 23، އެވެ.

އެ ހާދިސާގައި އަނިޔާވެ އިންދިރާ ގާނދީ މެމޯރިއަލް ހޮސްޕިޓަލުގައި ފަރުވާ ދެމުންދާ މީހުންގެ ތެރެއިން 3 މީހަކަށް އައިސީޔޫގައި ފަރުވާދެމުންދާއިރު، އެކަކު މިހާރުވަނީ ވޯޑަށް ބަދަލުކޮށްފައެވެ.

މިހާތަނަށް ބެލި ބެލުމުން އެކްސިޑެންޓް ހިނގާފައިވަނީ އެކުވެނި ކައިރިން ދުއްވާފައިދިޔަ ކާރެއް އެމަގުން ދުއްވާފައިދިޔަ އެހެން ކާރެއްގައި ޖެހި ކޮންޓްރޯލް ނުވެ ގޮސް، ހަމަ އެމަގުން ދުއްވާފައިދިޔަ ބަހެއްގައި ޖެހިގެންކަމަށް ފުލުހުން ބުނެއެވެ.

މި އެކްސިޑެންޓްގައި ކާރުގެ ކުރީކޮޅު އެއްކޮށް ވަނީ ފުނޑުފުނޑުވެފައެވެ. އަދި ބަހުގެ ކުރީކޮޅު ބަނޑިވެ ބިއްލޫރިގަނޑު އެއްކޮށް ވަނީ ތަޅައިގެން ގޮސްފަ އެވެ.

ފުލުހުން ގެންދަނީ މިމައްސަލަ ތަހުގީގް ކުރަމުންނެވެ.