ނ. ހެނބަދޫން ގެއްލިގެން ހޯދަމުންދާ އިބްރާހިމް ރާމިޒް ދަތުރުކުރިކަމަށް ބެލެވޭ ކެނޯ ފެނިއްޖެއެވެ.

އެމްއެމްޑީއެފުން ބުނީ، ރާމިޒް ދަތުރުކުރި ކަމަށް ބެލެވޭ ކެނޯ، ނ. ކެނދިކުޅުދޫގެ ހުޅަނގުއުތުރު ފަރާތު އަތިރިމައްޗަށް ލައްގާފައި އޮއްވައި އާންމު މީހަކަށް ފެނިގެން އެރަށުގެ ކައުންސިލަށް ރިޕޯޓުކޮށްފައިވާ ކަމަށެވެ. އަދި އެ މައުލޫމާތު ކޯސްޓްގާޑަށް ލިބިފައިވަނީ މިއަދު ހެނދުނު 10:15 ގައި ކަމަށެވެ.

"އޭނާ ހޯދުމުގެ މަސައްކަތް އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންއިން ދަނީ ކުރަމުން،" އެމްއެންޑީއެފުން ބުންޏެވެ.

ރާމިޒް ހޯދުމަށް ހެނބަދޫ އާއި ކެނދިކުޅުދޫ އަދި ކައިރީގައިވާ ރަށްތަކުގެ ގޮނޑުދޮށްތަކާއި ކަނޑުގެ ސަރަހައްދު ކޯސްޓްގާޑުގެ ސިފައިން ބަލާފައިވާ އިރު، އެމްއެންޑީއެފް ޑޯނިއާ މަތިންދާބޯޓުގައި ވައިގެމަގުން އެ ހިސާބުގެ ކަނޑުގެ ސަރަހައްދު ވަނީ ބަލައިފައެވެ.

ހެނބަދޫން ގެއްލިގެން ހޯދަމުންދާ އެރަށު ކުންނާރުމާގޭ އިބްރާހިމް ރާމިޒް އެންމެ ފަހުން ފެނިފައިވަނީ އިއްޔެ ހެނދުނު 8:00 ހާއިރު އެރަށު ބަނދަރު ސަރަހައްދުން ކަމަށާއި އެވަގުތު އޭނާ ލައިގެން ހުރީ ހުދު ޓީޝާޓަކާއި ނޫ ކުލައިގެ ފަޓުލޫނެއް ކަމަށް ކައުންސިލުން މަޢުލޫމާތުދެއެވެ. އޭގެފަހުން އޭނާގެ ހަބަރެއް ވެފައެއް ނުވެއެވެ.

ހެންބަދޫ ކައުންސިލުން ރާއްޖޭގެ ބައެއް މީޑިއާތަކަށް މަޢުލޫމާތު ދެމުން ބުނެފައިވަނީ ރާމިޒް ގެއްލުނު ކަމުގެ ރިޕޯޓް ލިބުނު ވަގުތުން ފެށިގެން އޭނާ ހޯދުމުގެ މަސައްކަތް އެރަށު ރައްޔިތުން ކުރަމުންދާ ކަމަށާއި ނަމަވެސް އަދިވެސް އޭނާގެ ޚަބަރެއް ނުވާކަމަށެވެ.