ދެވަނަ ލަންކާއަށް ރާއްޖެވުމުގެ ފުރުސަތު ނުދިނުމަށް މާވަށު ދާއިރާގެ މެންބަރު މުޙައްމަދު ސަޢީދު ގޮވާލައްވައިފިއެވެ.

ރާއްޖޭގެ ދަރަނި އިތުރަށް ބޮޑުވެ އިޤްތިސާދީ ގޮތުން ދިމާވެފައިވާ ގޮންޖެހުންތަކަށް ހައްލެއް ހޯދުމުގެ ގޮތުން ރައްޔިތުންނާ ސީދާ ގުޅުންހުރި ބައެއް ޓެކްސްތައް ބޮޑުކުރަން ސަރުކާރުން މިހާރުވަނީ ނިންމާފައެވެ. ހަމައެއާއެކު ކުރިއަށް އޮތް ދުވަސްތަކުގައި ތަކެތީގެ އަގު އިތުރަށް ބޮޑުވެގެންދާނެ ކަމަށްވެސް މާލީ ވަޒީރު އަމީރު ވަނީ ވިދާޅުވެފައެވެ.

އެކަމާ ގުޅިގެން ރައީސް ޔާމީންގެ ސަރުކާރުގެ އިޤްތިޞާދީ ވަޒީރު ސަޢީދު ވިދާޅުވީ ޢީދުޗުއްޓީ ނިމޭއިރު ތަކެތީގެ އަގު އިތުރަށް މައްޗަށްދާނެ ކަމަށެވެ. އަދި މިއީ ފައިސާ ޗާޕްކޮށްގެން ހިފެހެއްޓޭނެ ޙާލަތެއް ނޫން ކަމަށްވެސް ސަޢީދު ވިދާޅުވިއެވެ.

"ބޯހަރުކަމާއިއެކު ދެވަނަ ލަންކާއަށް ރާއްޖެ ނުހައްދަވާ!" ސަޢީދު ވިދާޅުވެފައިވެއެވެ.

ސަޢީދު އިތުރަށް ވިދާޅުވީ ޖޭޕީ މޯގަންއިން އެމެރިކާގެ އިޤްތިޞާދުވެސް ނުރައްކަލަށް ވެއްޓިފައިވާކަން ހާމަކޮށްފައިވާ ކަމަށެވެ.

ދުނިޔޭގައި އެންމެ ފާހަގަކޮށްލެވޭ އެއް އިންވެސްޓްމަންޓް ބޭންކް، އެމެރިކާގެ ޖޭޕީ މޯގަންނުން ވަނީ ދުނިޔޭގައި މިހާރު ހިނގަމުންދާ އެކި ކަންކަމާއި ގުޅިގެން ނަގާފައިވާ ދަރަނިތައް ނުދެއްކިދާނެކަމުގެ ބިރު އޮތް ގައުމުތަކުގެ ތެރޭގައި ދިވެހިރާއްޖެވެސް ހިމެނޭކަމަށް ބުނެފައެވެ.

ނަމަވެސް ޖޭޕީ މޯގަންގެ އިންޒާރު ފަތުރުވެރިކަމާބެހޭ ވަޒީރު ޑރ. މައުސޫމް ސިފަކުރައްވާފައި ވަނީ އެއީ ޖޭޕީ މޯގަންގެ ރިޝެޕްޝަންގައި އިންނަ ކުއްޖެއްގެ އިންޒާރެއްގެ ގޮތުގައެވެ. އަދި މާލީ ވަޒީރު އިބްރާހިމް އަމީރުވެސް ވަނީ، ޖޭޕީ މޯގަންގެ އިންޒާރަކީ ސީރިއަސް އިންޒާރެއް ނޫން ކަމަށް ދޭހަވާ މޭރުމުން ވާހަކަ ދައްކަވާފައެވެ.