ރައީސުލްޖުމްހޫރިއްޔާގެ ސްކޮލަރޝިޕް ލިބުނު ދަރިވަރުންނަށް ބޭނުން ދާއިރާއަކުން ބޭނުން ޤައުމަކުން ކިޔެވޭނެ ފުރުސަތު މި ސަރުކާރުން ފަހިކޮށްދީފައިވާ ކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހީމް ޙަސަން ވިދާޅުވެއްޖެއެވެ.

މިނިސްޓަރ މިގޮތަށް ވިދާޅުވީ މަތީ ސާނަވީ އިމްތިޙާނުން އެއްވަނަ ދަރަޖާގައި ފާސްވި ދަރިވަރުންނަށް ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ޙަވާކުރުމަށް ޣިޔާސުއްދީން އިންޓަނޭޝަނަލް ސްކޫލް ހޯލުގައި ރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ. އެގޮތުން މި ސަރުކާރުން މަތީ ތަޢުލީމަށް ވަރަށްބޮޑަށް އިސްކަމެއް ދެއްވާކަން މިނިސްޓަރ ފާހަގަކުރައްވާފައެވެ.

މިނިސްޓަރ ވިދާޅުވީ މީގެ އަހަރުތަކެއް ކުރިން ފެށިގެން ދެމުން އަންނަ މި ސްކޮލަރޝިޕަށް ރައީސް އިބްރާހީމް މުޙައްމަދު ޞާލިޙުގެ ސަރުކާރުން ބޮޑެތި ބަދަލުތައް ގެންނަވާފައިވާ ކަމަށެވެ. މީގެކުރިން ބައެއް ޤައުމުތަކުން ދިވެހި ދަރިވަރުންނަށް ސްކޮލަރޝިޕް ނުލިބޭތީ އަމިއްލައަށް ލޯނު ނަގައިގެން ކިޔަވަން ދިޔަ ބައެއް ދަރިވަރުންނަށް އެދަރިވަރުން ނެގި ލޯނަކީ ސްކޮލަރޝިޕްގެ ބައެއްކަމަށް ފަހުން ހަމަޖައްސަވައި އެދަރިވަރުންނަށް ރައީސް ލުއިގޮތްތަކެއް ހަމަޖައްސަވައިދެއްވާފައިވާކަމަށް މިނިސްޓަރ ވިދާޅުވެފައިވެއެވެ.

"މިހާރު މި ސްކޮލަރޝިޕް ބައްޓަންކޮށްފައިވާގޮތުން، ސްކޮލަރޝިޕް ލިބޭ ދަރިވަރުންނަށް އެދަރިވަރަކު ބޭނުން ދާއިރާއަކުން ބޭނުން ޤައުމަކުން ކިޔެވޭނެ ފުރުޞަތު ވަނީ ފަހިވެފައި." މިނިސްޓަރ ވިދާޅުވިއެވެ.

އިތުރަށް ވާހަކަފުޅު ދައްކަވަމުން މިނިސްޓަރ ވިދާޅުވީ ކޯވިޑް-19ގެ އެންމެ ނާޒުކު ޙާލަތުގައި ސަރުކާރުން އެތައް ފިޔަވަޅެއް އެޅުއްވިއިރުވެސް، ދަރިވަރުންނަށް ދެއްވާ ސްކޮލަރޝިޕްތަކާއި ސްޓޫޑެންޓް ލޯނުތަކަށް އެއްވެސް މަދުކުރެއްވުމެއް، އުނިކުރެއްވުމެއް ނުގެންނެވިކަމީ ރައީސް ޞާލިޙް މަތީ ތަޢުލީމަށްދެއްވާ އަހަމިއްޔަތުކަން ހާމަވާ ކަމެއްކަމަށެވެ.

ރޭގެ ޖަލްސާގައި 6 ދަރިވަރަކަށް ވަނީ މަތީ ސާނަވީ އިމްތިޙާނުން އެއްވަނަ ދަރަޖާގައި ފާސްވި ދަރިވަރުންނަށް ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕްގެ ލިޔުން ޙަވާލުކޮށްފައެވެ. މި ދަރިވަރުންނަށް ސްކޮލަރޝިޕް ލިބުނުކަމުގެ ލިޔުން ޙަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އަދި 79 ދަރިވަރަކަށް ހައި އެޗީވަރސް ސްކޮލަރޝިޕް ދެއްވާފައިވެއެވެ.