އަންނަ ދައުރު ފެށުމުގެ ކުރިން ޓެކްސް ބޮޑުކުރުމަށް މަޖިލީހަށް ހުށައަޅަން ދަޢުލަތުގެ މާލީ ވުޒާރާއިން ނިންމައިފިއެވެ.

ދަޢުލަތުގެ މާލީ ވުޒާރާއިން ހާމަކޮށްފައިވާ ގޮތުން ސަރުކާރުން މަސައްކަތް ކުރަމުން ގެންދަނީ 2023 ވަނަ އަހަރުގެ ޖެނުއަރީ 1 ވަނަ ދުވަހުން ފެށިގެން ޖީއެސްޓީއާއި ޓީޖީއެސްޓީއަށް ގެންނަ ބަދަލުތަކަށް އަމަލުކުރަން ފެށުމަށެވެ. އެގޮތުން ރައްޔިތުންގެ މަޖިލީހުގެ އަންނަ ދައުރު ފެށުމުގެ ކުރިން ޓެކްސް ބޮޑުކުރުމުގެ ބިލު ރައްޔިތުންގެ މަޖިލީހަށް ހުށަހަޅާނެކަމަށް މާލީ ވުޒާރާއިން ވަނީ ބުނެފައެވެ.

ރައްޔިތުންގެ މަޖިލީހުގެ ގަވާއިދު ބުނާ ގޮތުން މަޖިލީހުގެ ތިން ވަނަ ދައުރު ކުރިއަށްދާނީ އޯގަސްޓް މަހުގެ 16 ވަނަ ދުވަހުން ފެށިގެން ނޮވެމްބަރު މަހުގެ ނިޔަލަށެވެ. މަޖިލިސް މިވަގުތު އޮތީ ޗުއްޓީގައެވެ.

ދައުލަތަށް ލިބޭ އާމްދަނީ އިތުރުކުރުމަށް ޓީޖީއެސްޓީއާއި ޖީއެސްޓީ ބޮޑުކުރަން ނިންމާފައިވާކަން ފިނޭންސް މިނިސްޓަރ އިބްރާހިމް އަމީރު އިއުލާންކުރެއްވީ ރައީސުލްޖުމްހޫރިއްޔާ އޮފީހުގައި މި ޖުލައި މަހުގެ 5 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައެވެ.

ޓެކްސް ބޮޑުކުރާ މައްސަލާގައި އާންމު ރައްޔިތުންގެ ހުރި ހިތްހަމަނުޖެހުންތަކާ ގުޅިގެން މާލީ ވުޒާރާއިން ބުނެފައިވަނީ ރައްޔިތުންގެ ހިތްހަމަނުޖެހުން ހުންނާނެ ކަމަށް ގަބޫލުކުރެވޭ ކަމަށާއި ނަމަވެސް ދަޢުލަތުގެ ޚަރަދުތައް ރަނގަޅަށް މެނޭޖް ނުކުރެވިއްޖެނަމަ އެކަމުގެ ހިތްހަމަނުޖެހުންވެސް ރައްޔިތުންނަށް ކުރިމަތިވާނެ ކަމަށެވެ. އެގޮތުން ދައުލަތުގެ ޚަރަދުތައް ފޫނުބެއްދި، ދެކޮޅުނުޖެހި ޚަރަދުތައް ކޮންޓްރެކްޓް ކުރުމުގެ އަސަރުވެސް ކުރަނީ ރައްޔިތުންނަށް ކަމަށް މާލީވުޒާރާއިން ހާމަކޮށްފައިވެއެވެ.

ހަމައެއާއެކު އާންމު ރައްޔިތެއްގެ އަތުން ނަގާ ޓެކްސް ބޮޑުކުރަން ސަރުކާރުން ނިންމާނީ އިތުރު އޮޕްޝަނެއް ނެތުމުން ކަމަށާއި މިކަމުގައި އިޤްތިޞާދީ ދާއިރާގައި ޙަރަކާތްތެރިވާ ބޭފުޅުންގެ ކަންބޮޑުވުމަކީ ނޯޓިހުގެ މުއްދަތު ކުރުވުން ކަމަށްވެސް އެވުޒާރާއިން ވަނީ ބުނެފައެވެ.

ޓެކްސް ބޮޑުކުރުމާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި މާލީ ވަޒީރު އިބްރާހިމް އަމީރު ވިދާޅުވީ ދައުލަތަށް ލިބޭ އާމްދަނީ އިތުރުކުރުމަށް އަޅާ ފިޔަވަޅެއްގެ ގޮތުން ޓީޖީއެސްޓީ 12 ޕަސަންޓުން 16 ޕަސަންޓަށް، އަދި ޖީއެސްޓީ 6 ޕަސަންޓުން 8 ޕަސަންޓަށް ބޮޑުކުރަން ނިންމާފައިވާކަމަށެވެ.

އަމީރު ވިދާޅުވީ ދައުލަތުގެ އާމްދަނީ އިތުރުކުރުމަށް މިވަގުތު ފިޔަވަޅުތަކެއް ނާޅާއިފިނަމަ ކުރިއަށް އޮތް އަހަރު މާލީގޮތުން އިތުރު ދަތިތަކަކާއި ކުރިމަތިލާންޖެހޭނެކަމަށެވެ. އަދި ދައުލަތަށް ލިބޭ އާމްދަނީ އިތުރުކުރުމުގެ އިތުރުން، ދައުލަތުގެ ހަރަދުތައް ކުޑަކުރުމަށްވެސް މަސައްކަތްތަކެއް ކުރައްވަމުން ގެންދަވާނެކަމަށް އަމީރު ވިދާޅުވިއެވެ. އެގޮތުން ސަބްސިޑީތައް ރީފޯމްކޮށް، އިތުރު ޕްރޮޖެކްޓްތައް ހިންގުން މަޑުޖައްސާލާފައިވާކަމަށް އަމީރު ވިދާޅުވިއެވެ.