މުހިންމު ސުންގަޑިތަކެއް އަންނާތީ ސަމާލުވުމަށް މޯލްޑިވްސް އިންލެންޑް ރެވެނިއު އޮތޯރިޓީ މީރާއިން އިލްތިމާސްކޮށްފިއެވެ.

މީރާއިން ބުނެފައިވަނީ މިމަހުގެ 31ވަނަ ދުވަހު ޓެކުހާ ގުޅުންހުރި ގިނަ ސުންގަޑިތަކެއް އަންނަކަމަށެވެ. އޭގެތެރޭގައި ހިމެނެނީ ޖޫން 2022 ވަނަ އަހަރުގެ ދެވަނަ ކުއާޓަރުގެ ޖީ.އެސް.ޓީ ބަޔާން ހުށަހެޅުމުގެ ސުންގަޑިއާއި ޖޫން 2022ގެ ގްރީން ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑިއާއި ޖޫން 2022ގެ އެއަރޕޯރޓް ޓެކުހާއި ފީގެ ބަޔާން ހުށަހަޅައި ފައިސާ ދެއްކުމުގެ ސުންގަޑިއެވެ.

އޭގެ އިތުރުން އާމްދަނީން ނަގާ ޓެކުހުގެ 2022ވަނަ އަހަރުގެ ފުރަތަމަ އިންޓަރިމް ބަޔާން ހުށަހަޅައި ފައިސާ ދެއްކުމުގެ ސުންގަޑިވެސް ޖުލައި 31 އަށް ހަމަވާނެއެވެ. މިބަޔާން ހުށަހަޅަންޖެހޭނީ އިންކަމް ޓެކްސް ބަޔާން ހުށަހަޅަންޖެހޭ ފަރާތްތަކުގެ ތެރެއިން 2021 ވަނަ އަހަރު ދައްކަންޖެހުނު ޓެކުހުގެ އަދަދު 20،000 ރުފިޔާއަށްވުރެ އިތުރުވާ ފަރާތްތަކުންނެވެ. އަދި، 2022ވަނަ އަހަރަކީ ޓެކްސް ދައްކާ ފަރާތުގެ ފުރަތަމަ ޓެކްސް އަހަރުކަމުގައި ވާނަމަ އަންދާޒާކުރާ ޓެކުހުގެ ޢަދަދު 20،000 ރުފިޔާއަށްވުރެ އިތުރުވާނަމައެވެ.

މީރާއިން ބުނީ މި ޓެކްސްތަކަށް މީރާ ކަނެކްޓް މެދުވެރިކޮށް އޮންލައިންކޮށް ބަޔާން ހުށަހަޅައި ފައިސާ ދެއްކޭނެ ކަމަށެވެ. އަދި ޖުލައި މަހުގެ ފަހު ހަފްތާގައި ސަރުކާރާއި ބޭންކްތައް ބަންދުވާނެތީ އެކަމަށްވެސް ސަމާލުވުމަށް މީރާއިން ވަނީ އިލްތިމާސްކޮށްފައެވެ.