ޔޮޓް ޓުއާޒަށް 22.78 މިލިއަން ޑޮލަރު ދެއްކުމަށް އެލައިޑް އިންޝުއަރެންސްގެ މައްޗަށް ސިވިލްކޯޓުން ކުރި ހުކުމް ހައިކޯޓުން ބާތިލްކުރި މައްސަލަ ޔޮޓް ޓުއާޒް ކުންފުނިން ސުޕްރީމް ކޯޓުގައި އިސްތިޢުނާފް ކޮށްފިއެވެ.

މި މައްސަލައަކީ ޔޮޓް ޓުއާޒް ކުންފުނިން ކުރިން ހިންގި ހއ. އަލިދޫ ރިސޯޓަށް 2014 ވަނަ އަހަރު މޫސުން ގޯސްވެ، ލިބުނު ގެއްލުމުގެ ބަދަލު ހޯދަން އެލައިޑާ ދެކޮޅަށް ޔޮޓް ޓުއާޒް ކުންފުނިން ސިވިލް ކޯޓަށް ހުށައެޅި މައްސަލައެކެވެ. މި މައްސަލާގައި 2020 ވަނަ އަހަރު ސިވިލްކޯޓުން ނިންމާފައިވަނީ ހަމަސް ތެރޭގައި 22 މިލިއަން ޑޮލަރު ޔޮޓް ޓުއާޒަށް ދެއްކުމަށެވެ. އެގޮތުން އެލައިޑުން ޔޮޓް ޓުއާޒަށް މަހަކަށް 3.7 މިލިއަން ޑޮލަރު ދައްކަން ޖެހޭނެ ކަމަށް ސިވިލްކޯޓުން ކަނޑައެޅިއެވެ.

ނަމަވެސް އެލައިޑުން މައްސަލަ ހައިކޯޓުގައި އިސްތިއުނާފު ކުރުމުން ހައި ކޯޓުން ނިންމީ އަލިދޫ ރިސޯޓަށް ލިބިފައިވާ ގެއްލުންތަކަކީ މޫސުން ގޯސްވުމުގެ ސަބަބުން ލިބުނު ގެއްލުންތަކެއް ކަމަށް ސާބިތުނުވާ ކަމަށެވެ. އަދި މޫސުމީ ބަދަލުތަކުގެ ސަބަބުން ލިބުނުކަމަށް ޔޮޓް ޓުއާޒުން ބުނާ ގެއްލުންތަކަކީ އިންޝުއަރެންސް ޕޮލިސީގެ ތެރޭގައި ބަޔާންކުރާ ފަދަ ގެއްލުމެއްކަން ސާބިތު ކޮށްދެވިފައިނުވާ ކަމަށް ޙުކުމުގައިވެއެވެ. އެހެންކަމުން ހައިކޯޓުން މިދިޔަ އޭޕްރީލްމަހު 11 ވަނަ ދުވަހު ނިންމާފައިވަނީ ސިވިލް ކޯޓުގެ ހުކުމް ބާތިލް ކުރުމަށެވެ.

އެމައްސަލަ ޔޮޓް ޓުއާޒްގެ ފަރާތުން ސުޕްރީމްކޯޓުގައި އިލްތިމާސްކުރި ނަމަވެސް އެ ކޯޓުން އަދި މައްސަލަ ބަލައިގަތުމާމެދު ވަކިގޮތެއް ނިންމާފައެއް ނުވެއެވެ.