ދުނިޔެއަށް ކުރިމަތިވެފައިވާ އިޤްތިޞާދީ ދަތިކަމުގެ އަސަރުކުރާނީ ނިކަމެތިންނަށް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.

ދުނިޔޭގެ އިޤްތިޞާދަށް ކުރިމަތިވަމުންދާ ހީނަރުކަމުގެ ސަބަބުން ޚަރަދުކުޑަކުރުމުގެ ފިޔަވަޅުތަކެއް އެޅުމަށް ސަރުކާރުންވެސް ވަނީ ނިންމަވާފައެވެ. އެކަމާގުޅިގެން މެންބަރު ނިހާދު ވިދާޅުވީ އިޤްތިޞާދީ ދަތިކަމުގެ ހިތިއަސަރު ކުރާނީ އެންމެ ނިކަމެތި މީހާއަށް ކަމަށެވެ.

މިފަދަ ދަނޑިވަޅެއްގައި މުއްސަނދިން އިތުރަށްވާނީ މުއްސަނދިކަމަށާއި ނިކަމެތިންގެ އަތުގައި ހުރި ފައިސާކޮޅު ޚަރަދުކުރަންޖެހޭނީ ބޮޑުއަގުގައި ކާބޯތަކެތި ގަތުމަށްކަމަށް ނިހާދު ވިދާޅުވިއެވެ.

"ވިސްނާ ސޭވްކުރޭ. ޤައުމުގެ އިޤްތިޞާދު ހިފަހައްޓަން ޖެހޭ." ނިހާދު ވިދާޅުވިއެވެ.

ދުނިޔޭގެ ބާޒާރުގައި ތަކެތީގެ އަގު މައްޗަށް ދިއުމާއި ގުޅިގެން ހަރަދު ކުޑަކުރަން ފިޔަވަޅުތައް އެޅުމަށް ފިނޭންސް މިނިސްޓްރީން ވަނީ ނިންމަވާފައެވެ.

މި ނިންމުން ނިންމައި، ފިނޭންސް މިނިސްޓަރު އިބްރާހީމް އަމީރު ސޮއި ކުރައްވާ ނެރެފައިވާ މާލިއްޔަތާބެހޭ ސާކިއުލާއެއްގައި ބުނެފައިވަނީ، މިހާރު ކުރިއަށްދާ ރަޝިއާ ޔޫކްރޭން ހަނގުރާމައާއި ގުޅިގެން ދުނިޔޭގެ ބާޒާރުގައި ތެލާއި ތަކެތީގެ އަގު ބޮޑުވުވުމުގެ ސަބަބުން، އާ މުވައްޒަފުން ނުނަގައި އަދި މުސާރަ ބޮޑުވާ ގޮތަށް ޕޮރޮމޯޝަން ވެސް ދިނުން ހުއްޓާލާ ގިނަ ފިޔަވަޅުތަކެއް އަޅަން ނިންމާފައިވާ ކަމަށެވެ.

އަދި ދައުލަތުގެ ހަރަދުތައް ދަނީ ކުރިން އަދާޒާކުރި މިންވަރަށްވުރެ މާ ބޮޑަށް އިތުރުވަމުން ކަމަށާއި އޭގެ ސަބަބުން ދައުލަތަށް ލިބޭނެ އާމްދަނީ އާއި ކުރަން ޖެހޭ ހަރަދު ދިމާނުވެ، އިތުރު ގޮންޖެހުންތައް ކުރިމަތިވެދާނެ ކަމަށް ލަފާކުރެވޭކަމަށްވެސް ބުނެފައިވެއެވެ. އެހެންކަމުން، މި ދަނޑިވަޅުގައި ބަޖެޓަށް ބުރަވާފަދަ ކަންކަން ނުކުރުމަކީ އެންމެ ރަނގަޅުގޮތް ކަމަށް ފިނޭންސްގެ ސާކިއުލާގައިވެއެވެ.