ބޯހިމެނުގެ މަސައްކަތަށް ޔޫއެންޑީޕީން 20 ޓެބްލެޓް ހަދިޔާކޮށްފި އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އަށް މިތަކެތި ހަދިޔާކުރީ "އިންފޯމަލް ސެކްޓާ ސާވޭ 2021" ރިޕޯޓް ނެރުމުގެ ރަސްމިއްޔާތުގަ އެވެ. ޔޫއެންޑީޕީގެ ފަރާތުން ޓެބްލެޓްތައް ހަދިޔާކޮށް ދެއްވީ ރެޒިޑެންޓް ކޯޑިނޭޓަރު އެންރީކޯ ގަވޭލިއާ އެވެ. ޓެބްލެޓުތަކާ އެމްބީއެސްގެ ފަރާތުން ހަވާލުވެވަޑައިގަތީ ޗީފް ސްޓެޓިސްޓިޝަން އައިޝަތު ހުސައިނެވެ.

ޔޫއެންޑީޕީން ޓެބްލެޓްތައް ހަދިޔާކުރީ ބޯހިމެނުމުގެ މަސައްކަތްތައް ޑިޖިޓަލްކޮށް ކުރިއަށް ގެންދިއުމަށް ފަސޭހަކޮށްކޮށް ދިނުމުގެ ގޮތުން ވެދިން އެހީއެއްގެ ގޮތުގަ އެވެ. ބޯހިމެނުމުގެ މަސައްކަތުގައި ޖުމުލަ 1743 ޓެބްލެޓް ބޭނުންވާކަމަށް މޯލްޑިވްސް ބިއުރޯ އޮފް ސްޓެޓިސްޓްކްސް އިން ވަނީ ބުނެފައެވެ.

މިހާތަނަށް ބޯހިމެނުމުގެ މަސައްކަތަށް ބޭނުންވާ ޓެބްލެޓްގެ ތެރެއިން 1560 ޓެބްލެޓް ވަނީ ލިބިފައެވެ. މިގޮތުން ވާރލްޑް ބޭންކުން މިހާތަނަށް ވަނީ 300 ޓެބްލެޓް ހަދިޔާކޮށްފައެވެ. ޔޫއެންޑީޕީން 110 ޓެބްލެތް ހަދިޔާކޮށްފައިވާއިރު އޭޑިބީން ވަނީ 50 ޓެބްލެޓް ހަދިޔާކޮށްފައެވެ. އަދި ޔުނިސެފްއިން ވަނީ 100 ޓެބްލެޓް ހަދިޔާކޮށްފައެވެ.

މި މަސައްކަތަށް ދިވެހި ދައުލަތުގެ ބަޖެޓުން 812 ޓެބްލެޓް ފޯރުކޮށްދިނުމަށް ހަމަޖެހިފައިވެއެވެ. މީގެ އިތުރުން 250 ޓެބްލެޓް މިނިސްޓްރީ އޮފް އެޑިއުކޭޝަންގެ ފަރާތުން ބޯހިމެނުމުގައި ބޭނުންކުރުމަށް ޓެސްޓުކުރުމުގެ މަސައްކަތް ފަށާފައިވާކަމަށް ސްޓެޓިސްޓިކްސް ބިއުރޯއިން ބުނެފައިވެއެވެ.

މިހާރު ހަމަޖެހިފައިވާ ގޮތުން ރާއްޖޭގެ ހުރިހާ ސަރަހައްދެއްގައިވެސް ބޯހިމެނުމަށް ބޭނުންވާ މައުލޫމާތު އެއްކުރުމަށް ހަމަޖެހިފައި ވަނީ ސެޕްޓެމްބަރު މަހުގެ 13 ވަނަ ދުވަހުން ފެށިގެން 15 ވަނަ ދުވަހަށެވެ. އަދި އެ މަހުގެ 13 ވަނަ ދުވަހުން 25 ވަނަ ދުވަހަށް ބޯހިމެނުގެ އަމަލީ މަސައްކަތްތައް މާލޭ ސަރަޙައްދުގައި ކުރިއަށް ގެންދާނެކަމަށް ތަފާސް ހިސާބާއި ބެހޭ ޤައުމީ އިދާރާއިން ބުނެއެވެ.

ރާއްޖޭގެ ބޮޑެތި ރަށްރަށުގައި ބޯހިމެނުމުގެ އަމަލީ މަސައްކަތް ކުރިއަށް ގެންދާނީ ސެޕްޓެމްބަރ މަހުގެ 17 އިން 22 އަށެވެ. ކުދި ރަށްތަކުގައި ބޯހިމެނުމުގެ އަމަލީ މަސައްކަތް ކުރާނީ އެ މަހުގެ 12 އިން 21 އަށެވެ. ބޯހިމެނުމުގެ މަސައްކަތަށް ޖުމްލަ 4،400 މީހުން ބޭނުންވާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ކުރިން ވަނީ ބުނެފައެވެ.

ބޯހިމެނުމުގެ މި އަހަރުގެ ޝިއާރަކީ "8 ބިލިއަން މީހުންގެ ދުނިޔެއެއް: ކެތްތެރި މުސްތަގުބަލަކާ ދިމާއަށް، ފުރުސަތުތައް ބޭނުންކޮށް އެންމެންނަށް ހައްގުތަކާއި އިހްތިޔާރުތައް ކަށަވަރުކުރުން" މިއެވެ. ބޯހިމެނުމުގެ ވަގުތީ ނަތީޖާ މިއަހަރުގެ އޮކްޓޫބަރު ހަވަނަ ދުވަހު އިއުލާންކުރުމަށް ހަމަޖެހިފައިވާއިރު ދާއިމީ ނަތީޖާ އެ މަހުގެ 20 ވަނަ ދުވަހު އިއުލާން ކުރާނެ އެވެ.

ރާއްޖޭގައި އެންމެފަހުން ބޯހިމަނާފައިވަނީ 2014 ވަނަ އަހަރުއެވެ.