މިދިޔަމަހު ގްރީން ފަންޑަށް 70.8 މިލިއަން ރުފިޔާ ލިބިފައިވާކަމަށާއި، އަދި އެމަހު ގްރީން ފަންޑުން 52 މިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން މިދިޔަ ޖޫންމަހު 38 މަޝްރޫއަކަށް ގްރީން ފަންޑުން ވަނީ ޚަރަދުކޮށްފައެވެ. މީގެތެރޭގައި ފެނާއި ނަރުދަމާގެ މަސައްކަތްތަކާއި ގޮނޑުދޮށް ޙިމާޔަތްކުރުމުގެ މަސައްކަތްތަކުގެ މަޝްރޫއުތައް ހިމެނެއެވެ.

ޖޫންމަހު ރިސޯޓްތަކުން ގްރީން ފަންޑަށް 66.6 މިލިއަން ރުފިޔާ ލިބިފައިވާއިރު ގެސްޓްހައުސްތަކުން ލިބިފައިވަނީ 1.7 މިލިއަން ރުފިޔާއެވެ.

ގްރީން ފަންޑަކީ ތިމާވެއްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކްހެކެވެ. 2016 ވަނަ އަހަރު ނަގަން ފެށި ގްރީން ޓެކްސްގެ ގޮތުގައި ނަގަނީ ރިސޯޓުތަކާއި ސަފާރީ އާއި ހޮޓާތަކުގައި ޗުއްޓީ ހޭދަކުރާ ކޮންމެ މީހެއްގެ އަތުން 6 ޑޮލަރެވެ. އަދި ގެސްޓް ހައުސްތަކުގައި ޗުއްޓީ ހޭދަކުރާ މީހުންގެ އަތުން 3 ޑޮލަރެވެ.

މިދިޔަމަހު ގްރީން ފަންޑަށް 70.8 މިލިއަން ރުފިޔާ ލިބިފައިވާއިރު، އެންމެ ބޮޑު ޢާމްދަނީއެއް ޖުލައިމަހު ލިބިފައިވަނީ ކ. އަތޮޅުންނެވެ. އެއީ 25 މިލިއަން ރުފިޔާއެވެ.