ބޮޑީބޯޑިން ވަރލްޑް ޓުއާގެ މުބާރާތެއް ކަމަށްވާ "ވިޒިޓް މޯލްޑިވްސް ޕްރޯ 2022" ރާއްޖޭގައި ކުރިއަށް ގެންދާތީ މޯލްޑިވްސް ބޮޑީ ބޯޑިން އެސޯސިއޭޝަނަށާއި ކުޅިވަރާބެހޭ ވަޒީރު އަޙްމަދު މަޙުލޫފަށް ރައީސް ނަޝީދު މަރުޙަބާ ވިދާޅުވެއްޖެއެވެ.

"ވިޒިޓް މޯލްޑިވްސް ޕްރޯ 2022" އަކީ އިންޓަނޭޝަނަލް ބޮޑީބޯޑިން ކޯޕަރޭޝަން އައިބީސީގެ ބޮޑީބޯޑިން ވޯލްޑް ޓުއާގެ އެއް ބައެވެ. މިއީ ވޯލްޑް ޓުއާ މުބާރާތެއް އޭޝިއާގައިވެސް ބާއްވާ ފުރަތަމަ މުބާރާތެވެ. ޖުލައި މަހުގެ 29 އިން އޮގަސްޓް މަހުގެ 7 ވަނަ ދުވަހުގެ ނިޔަލަށް މި މުބާރާތް ކުރިޔަށްދަނީ މާލޭ ރާޅުގަނޑު ސަރަހައްދުގައެވެ.

ރައީސް ނަޝީދު މިއަދު ވިދާޅުވީ 10 ޤައުމަކުން ވާދަކުރާ މި މުބާރާތް ރާއްޖޭގައި ބޭއްވޭކަމީ އެމަނިކުފާނަށް ލިބިވަޑައިގަންނަވާ ވަރަށް ބޮޑު ހިތްހަމަޖެހުމެއް ކަމަށެވެ. އޭގެ އިތުރުން މުބާރާތުގެ އެންމެހާ ބައިވެރިންނަށް ވަރަށް ފުރިހަމަ ކާމިޔާބީއަކަށް ރައީސް ނަޝީދުވަނީ އެދިވަޑައިގެންފައެވެ.

Very pleased to see the IBC bodyboarding world tour taking place in Maldives, with 10 countries taking part. Good luck to all the participants and congrats Maldives Body Boarding Association and @AhmedMahloof for facilitating such a great event in 🇲🇻

— Mohamed Nasheed (@MohamedNasheed) August 3, 2022

ދުނިޔޭގެ ޗެމްޕިއަން ބޮޑީބޯޑަރުން ވާދަކުރާ މި މުބާރާތުގައި އެކި ގައުމުތަކުން 150 އެއްހާ އެތުލީޓުން ވާދަކުރެއެވެ. ހަތަރު ކެޓަގަރީއަކުން ބައިވެރިން ވާދަކުރާ މި އިވެންޓަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ.