ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ފޯނު މީހަކު ޖަހައިގަނެގެން ގެންގޮސްފިއެވެ.

މިކަން ހާމަ ކުރައްވާފައިވަނީ، މަޖިލީހުގެ ނާއިބު ރައީސް އީވާ ޢަބްދުﷲ، މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައެވެ. ރައީސް ނަޝީދުގެ ދަރިކަނބަލުން އީވާއަށް ފޮނުއްވި މެސެޖެއްކަމަށް ވިދާޅުވެ އީވާ އެ ގްރޫޕްގައި ހިއްސާކުރި މެސެޖުގައިވަނީ، އިނގިރޭސިވިލާތުގެ ރެސްޓޯރެންޓެއްގައި ފަރިއްކުޅުއްވަން އިންނަވަނިކޮށް މީހަކު އައިސް ރައީސް ނަޝީދުގެ ފޯނު ޖަހައިގަނެގެން ދުވެ ފިލާފައިވާކަމަށެވެ. އަދި ރައީސް ނަޝީދުގެ ނަންބަރު ބްލޮކް ކޮށްދިނުމަށް އެ މެސެޖުގައި އެމަނިކުފާނުގެ ދަރިކަނބަލުން އެދިވަޑައިގެންފައިވެއެވެ.

އެ މެސެޖު ގްރޫޕްގައި ހިއްސާ ކުރުމާއެކު މަޖިލީހުގެ ކައުންސެލަރ ޖެނެރަލް ފިލްޒާ ވަނީ ރައީސް ނަޝީދުގެ ނަންބަރު ގްރޫޕުން ބޭރުކޮށްފައެވެ.

މިކަން ހިނގި ގޮތުގެ ތަފުސީލު ރަސްމީ އެއްވެސް ފަރާތަކުން އަދި ހާމަކޮށްދީފައެއް ނުވެއެވެ.

ރައީސް ނަޝީދުގެ ފޯނު ޖަހައިގެންފައިމިވަނީ، ރައީސް ޞާލިޙްގެ ނުރަނގަޅު ފޮޓޯތަކެއް އެމަނިކުފާނަށް ލިބިވަޑައިގެންފައިވާކަމަށް ވިދާޅުވެފައި ވަނިކޮށެވެ. ރައީސް ނަޝީދުގެ އަތްޕުޅުގައި ހުރިކަމަށް ވިދާޅުވާ ފޮޓޯތައް ހިއްސާ ކުރެއްވުމަށް ވެސް ގިނަ ބަޔަކު ވަނީ އެދިފައެވެ.