އއ. ކުރަމަތި ރިސޯޓްގައި ވަޒީފާ އަދާކުރި ދިވެހި ފިރިހެނަކު މަސްތުގެ ހާލަތުގައި ހުރެ އެ ރިސޯޓްގައި މަސައްކަތްކުރާ އެހެން ބަޔަކަށް ހަމަލާދިން މައްސަލައެއްގައި އެ ފިރިހެންމީހާ ފުލުހުންގެ ބެލުމުގެ ދަށަށް ގެންގޮސްފިއެވެ.

މީސްމީޑިއާގައި އާންމުވެފައިވާ ވީޑިއޯއަކުން ފެންނަގޮތުގައި، އެ ފިރިހެން މީހާ ހަމަނުޖެހުން ހިންގަން އުޅޭއިރު އިތުރު ބަޔަކު ވަނީ އޭނާ ހިފެހެއްޓުމަށް ހަރުކަށިގޮތަކަށް މަސައްކަތް ކުރަމުންނެވެ. އެގޮތުން އޭނާ މަގުމައްޗަށް ނެރެ ފޮތިގަނޑެއް އައްސައިގެން އުފުލާލައިގެން ގެންދާ މަންޒަރު ވެސް ފެނެއެވެ.

މައުލޫމާތު ލިބިފައިވާ ގޮތުގައި ގަދަކަމުންވެސް އޭނާ ހިފަހައްޓަން އެ ރަށުގެ ސެކިއުރިޓީ މަސައްކަތް ކޮށްފައިވަނީ މަސްތުގެ ހާލަތުގައި ހުރެ އެ ރަށުގެ އެހެން ގިނަ މުވައްޒަފުންތަކަކަށް ހަމަލާ ދިނުމުގެ ސަބަބުން އޭނާ ކޮންޓްރޯލް ކުރުމުގެ ގޮތުންނެވެ.

މި ހާދިސާއާއި ގުޅޭގޮތުން ފުލުހުންގެ މީޑިއާ އޮފިޝަލް މި ނޫހަށް ވިދާޅުވީ، އެ ރިސޯޓުން މަސްތުހާލަތުގައި ހުރި މީހަކު ހަމަނުޖެހުން ހިންގާ ކަމަށް ރޭ ފުލުހުންނަށް ރިޕޯޓްކޮށްފައިވާ ކަމަށެވެ. އަދި އެ މައްސަލައާ ގުޅިގެން 23 އަހަރުގެ ދިވެހި ފިރިހެނަކު ފުލުހުން ހައްޔަރުކޮށްފައިވާ ކަމަށް އޮފިޝަލް ވިދާޅުވިއެވެ.

އޮފިޝަލް ވިދާޅުވީ، ހައްޔަރު ކުރި މީހާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ތިން ދުވަހުގެ މުއްދަތެއް ދީފައިވާ ކަމަށާއި ފުލުހުން ދަނީ މި މައްސަލަ އިތުރަށް ތަހުގީގު ކުރަމުން ކަމަށެވެ.