މަސައްކަތުގެ މާހައުލުން ބޭރުގައި ލައިފްސްޓައިލްގެ ބައެއް ސްކިލްސް ދަސްކޮށްދިނުމުގެ މަޤްޞަދުގައި އެމްއެންޑީއެފުން ޑިފެންސް މިނިސްޓްރީގެ މުވައްޒަފުންނަށް "ވީކެންޑް ވިތު އެމްއެންޑީއެފް" ޕްރޮގްރާމެއް ހިންގައިފި އެވެ.

އޮގަސްޓް މަހުގެ 13 ވަނަ ދުވަހުގެ ހެނދުނު 6 އިން ހަވީރު 6 އަށް ގިރިފުށީ ޓްރެއިނިންގ ސެންޓަރުގައި ކުރިއަށްގެންދިޔަ މި ޕްރޮގްރާމްގައި ކުރިއަށްދިޔަ ގޮތް ބައްލަވައިލެއްވުމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ގިރިފުށީ ޓްރެއިނިންގ ސެންޓަރަށް ޒިޔާރަތްކުރެއްވިއެވެ.

މި ޕްރޮގްރާމްގައި ޓީމް ބިލްޑިންގ އެކްޓިވިޓީތަކާއި، ލީޑަރޝިޕް އެކްޓިވިޓީތަކުގެ އިތުރުން ކޮމްޕެޓިޓިވް ފިޓްނަސް އެކްޓިވިޓީތަކާއި ސީ ސަވައިލަންސް ފަދަ ބައިތައް ވަނީ ކުރިއަށްގެންދެވިފައެވެ.

ޑިފެންސް މިނިސްޓްރީގެ 30 މުވައްޒަފުންނާއި އެ މުވައްޒަފުންގެ އާއިލާތަކުގެ 15 މެމްބަރުންނާއެކު، ޖުމްލަ 45 ފަރާތަކުން ބައިވެރިވި މި ޕްރޮގްރާމްގެ، ލެކްޗަރާއިންނަށާއި މުދައްރިބުންގެ ގޮތުގައި ހަރަކާތްތެރިވެފައި ވަނީ އެމްއެންޑީއެފްގެ އެކި ދާއިރާތަކުގައި މަސައްކަތްކުރައްވާ ސިފައިންނެވެ.

އެމްއެންޑީއެފުން ވަނީ މީގެ ކުރިން ވެސް ރައްޔިތުން ހިއްސާވާ ބައެއް ކުންފުނިތަކާއި، މިނިވަން މުވައްސަސާތަކާއި، ސަރުކާރުގެ ބައެއް ވުޒާރާތަކަށް އަމާޒުކޮށްގެން "ވީކެންޑް ވިތު އެމްއެންޑީއެފް" ޕްރޮގްރާމް ހިންގާފައެވެ.