އެޗްޑީސީގެ އެމްޑީ ސުހައިލް އެމަޤާމުން ރިޓަޔަރ ކުރައްވައިފިއެވެ.

އެޗްޑީސީން މިއަދު ބުނީ އެކުންފުނީގެ މެނޭޖިންގ ޑިރެކްޓަރ ސުހައިލް އަހުމަދު 25 އޮގަސްޓުން ފެށިގެން މަގާމުން ރިޓަޔަރކުރެއްވުމަށް ނިންމަވާފައިވާ ކަމަށެވެ.

އެޗްޑީސީން ބުނީ ސުހައިލަކީ އެންމެނާއި ގުޅިގެން މަސައްކަތްކުރެއްވި ހިތްހެޔޮ، މަޑުމައިތިރި މިޒާޖެއްގެ ބޭފުޅެއް ކަމަށެވެ. އެހެންކަމުން އެޗްޑީސީގެ އިސްވެރިންނާއި ހުރިހާ މުވައްޒަފުންގެ ނަމުގައި އެކުންފުންޏަށް ކޮށްދެއްވި ޚިދުމަތްތަކާއި ބެހެއްޓެވި ގާތްކަމަށް އެޗްޑީސީން ވަނީ ސުހައިލަށް ޝުކުރު ދަންނަވާފައެވެ.

2001 ވަނަ އަހަރު ސުހައިލް އެޗްޑީސީއާ ގުޅިވަޑައިގެންނެވީ ހުޅުމާލޭގެ ބިން ހިއްކުމާއި ތަރައްޤީ ކުރުމުގެ މަސައްކަތްތަކަށް ވަކި އިދާރާއެއް އުފެއްދުމާއި އެކުގައެވެ. އެގޮތުން، ހުޅުމާލޭގައި 200 އާއިލާ އެންމެ ފުރަތަމަ އާބާދުވިއިރުވެސް ސުހައިލް ވަނީ އެ ކުންފުނީގެ އިސް މަގާމުތަކުގައި މަސައްކަތްކުރަށްވާފައެވެ.

އޭގެ އިތުރުން، ސުހައިލަކީ ހުޅުމާލެއަށް މީހުން ވަޒަންވެރިވަމުން ދިޔައިރު، ރައްޔިތުންނަށް އިތުރު ބޯހިޔާވަހިކަމަށް ބޭނުންވާކަން ފާހަގަކުރެވި، ހުޅުމާލޭގެ ދެވަނަ ފިޔަވަހި ހިއްކުމުގެ މަޝްރޫއު ކުރިޔަށް ގެންދިޔުމުގެ މަސައްކަތް ކުރުމުގައި އެންމެ އިސްކޮށް ހަރަކާތްތެރި ވަމުންއައި ބޭފުޅެކެވެ. އަދި ބިޔޯންޑް ހުޅުމާލެގެ ނަމުގައި އަތޮޅުތަކަށްވެސް އެޗްޑީސީގެ ތަޖުރިބާ ގެންދިއުމުގެ މަސައްކަތްވެސް ފައްޓަވާފައިވާ ކަމަށް އެޗްޑީސީން ބުނެފައިވެއެވެ.

އެޗްޑީސީން ބުނީ ސަރުކާރުގެ އެންމެ ބޮޑު އެއް އެސް.އޯ.އީ އަކަށް އެޗްޑީސީ ވީއިރު، ސުހައިލަކީ ފާއިތުވެދިޔަ 4 ވެރިކަމުގައިވެސް އެކުންފުނީގެ އިސް މަގާމުތަކެއް ފުރުއްވާ އެ ކޯޕަރޭޝަނަށް ގިނަގުނަ ޙިދުމަތްތަކެއް ކޮށްދެއްވާފައިވާ ބޭފުޅެއް ކަމަށެވެ.