2020/2021 ވަނަ އަހަރުގެ މަތީ ސާނަވީއާއި ސާނަވީ އިމްތިޙާނުތަކުން ޤައުމީ ގަދަ ދިހައެއްގައި 1105 ދަރިވަރުން ހިމެނިއްޖެއެވެ.

ސާނަވީ އިމްތިހާނުތަކުންނާއި މަތީ ސާނަވީ އިމްތިހާނުތަކުން އެންމެ ރަނގަޅު ނަތީޖާ ހާސިލު ކުރާ ދަރިވަރުން ފާހަގަކޮށް "މަތީ އަރުތަވެރިންގެ އިނާމު" ސަރުކާރުން ރޭވަނީ ދީފައެވެ. އެގޮތުން 2020/2021 ވަނަ އަހަރު މަތީ ސާނަވީގެ ގަދަ ދިހައެއްގައި ހިމެނިފައިވަނީ 348 ދަރިވަރުންނެވެ. އަދި ސާނަވީގެ ގަދަ ދިހައެއްގައި ހިމެނިފައިވަނީ 757 ދަރިވަރުންނެވެ.

މަތީ ސާނަވީގެ ގަދަ ދިހައެއްގެ އެއްވަނަ ލިބުނީ ހަ ދަރިވަރަކަށެވެ. އެއީ ސީއެޗްއެސްސީގެ ފަސް ދަރިވަރުންނާއި ކުޅުދުއްފުށީ ޖަލާލުއްދީން ސްކޫލްގެ އެއް ދަރިވަރަކަށެވެ. އަދި ސާނަވީ އިމްތިޙާނުގެ ގަދަ ދިހައެއްގެ އެއްވަނަ 29 ދަރިވަރަކު ޙާސިލްކޮށްފައިވެއެވެ.

ސާނަވީގެ ގަދަ ދިހައެއްގައި ހިމެނުނު ދަރިވަރުންގެ ތެރެއިން 13 ދަރިވަރުން ވަނީ 5 މާއްދާއިން ދުނިޔޭގެ އެންމެ މޮޅު 10 ދަރިވަރުންގެ ތެރޭގައި ހިމެނިފައެވެ. މަތީ ސާނަވީ އިމްތިޙާނު ހެދި ދަރިވަރުންގެ ތެރެއިން 13 ދަރިވަރުން ވަނީ 8 މާއްދާއިން ދުނިޔޭގެ އެންމެ މޮޅު 10 ދަރިވަރުންގެ ތެރޭގައި ހިމެނިފައެވެ.

2020-2021 ވަނަ ދިރާސީ އަހަރު ސާނަވީ ތަޢުލީމު ނިންމައި، ދިވެހިރާއްޖެއިން 5955 ދަރިވަރުން ވަނީ އެސް.އެސް.ސީ އަދި އޯލެވެލް އިމްތިޙާނުތަކުގައި ބައިވެރިވެފައެވެ. އަދި މަތީ ސާނަވީ ތަޢުލީމު ނިންމައި، ދިވެހިރާއްޖެއިން 2641 ދަރިވަރުން ވަނީ އެޗް.އެސް.ސީ އަދި އޭލެވެލް އިމްތިހާނުތަކުގައި ބައިވެރިވެފައެވެ.