ރައްޔިތުންނަށް ލާޒިމުވެގެންވަނީ ޙައްޤުތައް ރައްކާތެރި ކުރުމަށް ދައުލަތަށް އެހީތެރިވުންކަމަށް އައްޝައިޚް އަޙްމަދު ސަމީރު ވިދާޅުވެއްޖެއެވެ.

ޖަމިއްޔަތުލް ސަލަފުގައި އިސްކޮށް ހަރަކާތްތެރިވެވަޑައިގަންނަވާ ޝައިހް އަހުމަދު ސަމީރު ވިދާޅުވީ އިސްލާމީ ޝަރީޢަތުން ކަށަވަރުކޮށްދެއްވާފައިވާ ޙައްޤުތައްކަމުގައިވާ އިސްލާމްދީނާއި، މީހާގެ ނަފްސާއި، ނަސްލާއި، މުދަލާއި، ބުއްދިއާއި، އަބުރު ޙިމާޔަތްކުރުމަށް އެންމެމަތީ ދަރަޖައިގައި މަސައްކަތް ކުރުން ދައުލަތުގެ މައްޗަށް ލާޒިމްވެގެންވާ ކަމަށެވެ.

އަދި ރައްޔިތުންގެ މައްޗަށް ލާޒިމުވެގެންވަނީ އެކަންކަން ޙިމާޔަތްކޮށް ރައްކާތެރި ކުރުމަށް ދައުލަތަށް ފުރުސަތުދީ އެހީތެރިވެދިނުން ކަމަށް ޝައިޚް ސަމީރު ވިދާޅުވިއެވެ.

"މީސްމީހުން އަމިއްލައަށް މަގުމަތީ ޙުކުމްކޮށް ތަންފީޒުކުރާ ހިސާބަށް ޤައުމެއްގެ ޙާލަތު ދިޔުމީ ކަންބޮޑުވާންޖެހޭ ކަމެއް." ޝައިޚް ސަމީރު ވިދާޅުވެފައިވެއެވެ.

ޝައިޚް ސަމީރު މިމޭރުމުން ވިދާޅުވެފައިވާއިރު އިންސާފު ހޯދުމަށް ކަމަށް ބުނެ ޖިނާއީ މައްސަލަތަކުގައި ތުހުމަތު ކުރެވޭ މީހުންނާމެދު އަނިޔާވެރި އަމަލު ނުހިންގަން ފުލުހުންވެސް ވަނީ އިލްތިމާސްކޮށްފައެވެ. އަދި އެފަދަ ކުށްތައް ހިންގާ ފަރާތްތަކުގެ މައްސަލަ ތަހުގީގުކޮށް ގާނޫނީ ފިޔަވަޅު އަޅާނެކަމުގެ އިންޒާރުވެސް ފުލުހުން ވަނީ ދީފައެވެ.