އެމްއެންޑީއެފް ސެންޓްރަލް އޭރިއާ ކޮމާންޑުން ތ. ގުރައިދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާ ގުޅިގެން ތ. ގުރައިދޫ ސަރުކާރު މުއައްސަސާތަކުގެ މުވައްޒަފުންނަށް އަމާޒުކޮށްގެން ހޭލުންތެރިކުރުމުގެ ޕްރޮގްރާމެއް ހިންގައިފިއެވެ.

އެމްއެންޑީއެފުން ބުނީ އޮގަސްޓް 26 ން 27 އަށް ތ. ގުރައިދޫ ކައުންސިލް އިދާރާގެ ހޯލުގައި ކުރިއަށް ގެންދިޔަ މި ޕްރޮގްރާމުގައި ޞިއްޙީ ފުރަތަމައެހީ ދިނުމާއި އަލިފާނުގެ ހާދިސާއިން ރައްކާތެރިވުމާ ބެހޭގޮތުން ޕްރޮގްރާމުގެ ބައިވެރިންނަށް މަޢުލޫމާތު ދީފައިވާ ކަމަށެވެ. މި ޕްރޮގްރާމުގައި ތ. ގުރައިދޫން 30 މީހުން ބައިވެރިވިއެވެ.

މި ޕްރޮގްރާމްގައި ޞިއްޙީ ފުރަތަމައެހީ ދިނުމުގައި ސީޕީއާރު ދޭނެ ގޮތާއި، ޒަޚަމްތަކާ ގުޅޭގޮތަށް ބެންޑޭޖް ކުރާނެ ގޮތާއި، ބަލިމީހުން އުފުލާ ސްޓްރެޗަރ ބޭނުން ކުރާނެގޮތުގެ މަޢުލޫމާތު ފޯރުކޮށްދީ، ޢަމަލީގޮތުން އެކަން ކުރާގޮތް ވަނީ ދައްކުވައިދީފައެވެ.

އަލިފާނުގެ ހާދިސާއިން ރައްކާތެރިވުމާ ބެހޭގޮތުން ދެއްވި މަޢުލޫމާތުގެ ތެރޭގައި އަލިފާނުގެ ހާދިސާއެއް ހިނގައިފިނަމަ، އަލިފާން ނިއްވުމަށް ބޭނުންކުރާ ފުޅިއާއި ބްލޭންކެޓް ބޭނުންކުރާނެގޮތް ކިޔައިދީ، ޢަމަލީގޮތުން ވަނީ އެކަން ކުރާގޮތް ދައްކުވައިދީފައެވެ.

މި ޕްރޮގްރާމުގައި ބައިވެރިން ވަނީ ޕްރޮގްރާމުގައި ލިބުނު މަޢުލޫމާތުގެ އަލީގައި އެކަން އިތުރަށް ތަޖުރިބާކުރުމުގެ ގޮތުން ޢަމަލީގޮތުން ފަރިތަކުރުން ކުރިއަށްގެންގޮސްފައެވެ.

މި ޕްރޮގްރާމުގެ ބައިވެރިންނަށް މަޢުލޫމާތު ފޯރުކޮށްދިނީ، އެމްއެންޑީއެފް ސެންޓްރަލް އޭރިއާ ކޮމާންޑުގެ ސިފައިންނެވެ.