ނިޔާވެފައިވާ މީހަކު ފުލުހުންގެ ތަހުގީގަށް ހާޒިރުވުމަށް އަންގައި އިއުލާނުކުރެވުނީ އިދާރީ އޮޅުމަކުންކަމަށް މޯލްޑިވްސް ޕޮލިސް ސަރވިސްއިން ހާމަކޮށްފިއެވެ.

ފުލުހުން މިކަން ހާމަކޮށްފައި މިވަނީ ނިޔާވެފައިވާ މީހަކު ފުލުހުންގެ ތަހުގީގަށް ހާޒިރުކުރަން އިއުލާންކުރުމާއި ގުކިގެން ގިނަ ބަޔަކު ފާޑު ކިޔަމުންދާ ދަނޑިވަޅެއްގައެވެ.

ފުލުހުން ކުރި ޓްވީޓެއްގައި ބުނީ އެކަން އެހެން ދިމާވީ އިދާރީ އޮޅުމަކުންކަމަށާއި، ނިޔާވެފައިވާ މީހާގެ އާއިލާއާއި އާންމުންގެ ކިބައިން، ދިވެހި ފުލުހުންގެ ޚިދުމަތުގެ ފަރާތުން ނިހާޔަތަށް މައާފަށް އެދޭކަމަށެވެ. ‏އަދި މިފަދަ ކަމެއް ތަކުރާރުވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އަޅައި، މިފަދަ ކަންކަމުގައި އަމަލުކުރަމުންގެންދާ އުސޫލުތަކަށް ގެންނަޖެހޭ ބަދަލުތައް އެ މުއައްސަސާއިން ގެންނާނެކަމުގެ ޔަގީންކަން އަރުވާކަމަށްވެސް ފުލުހުން ބުނެފައިވެއެވެ.

ނިޔާވެފައިވާ މީހަކު ފުލުހުންގެ ތަހުގީގަށް ހާޒިރުވުމަށް އަންގައި އިއުލާނުކުރެވިފައިވާ މައްސަލައާ ގުޅިގެން ދަންނަވަމެވެ.

އެމީހާ ފުލުހުންގެ ތަހުގީގަށް ހާޒިރުވުމަށް އަންގައި އިއުލާނު ކުރެވިފައިވަނީ އިދާރީ އޮޅުމަކުންނެވެ.
1/3

— Maldives Police (@PoliceMv) August 28, 2022

މިއަދު ހެނދުނު ފުލުހުން ފޮޓޯއާއެކު އިއުލާންކުރީ އދ. ދަނގެތި، ފެހިވިލާ ޝަކުލުﷲ އަލީ ނަމަކަށް ކިޔާ މީހަކު ހޯދުމަށެވެ. އޭނާ ހޯދަމުންދަނީ މަކަރާއި ހީލަތުން ފައިސާ ހޯދުމުގެ މައްސަލައެއްގައިކަމަށް ފުލުހުންގެ އިއުލާންގައިވެއެވެ.

ޝަކުލުﷲ ހޯދުމަށް ފުލުހުން އިއުލާންކުރިއިރު އޭނާ ވަނީ މިދިޔަ އަހަރުގެ ޖޫން މަހުގެ 19 ވަނަ ދުވަހު ނިޔާވެފައެވެ.