ޕޯސްޓްގެ ޒަރީއާއިން ރާއްޖެ އެތެރެކުރަން އުޅުނު މިލިއަނެއްހާ ރުފިޔާގެ މަސްތުވާތަކެތި ކަސްޓަމްސުން އަތުލައިގަނެފިއެވެ.

ކަސްޓަމްސުން މިއަދު ބުނީ މިތަކެތި އަތުލައިގެންފައިވަނީ 2022 ޖޫން 29 ވަނަ ދުވަހު ޕޯސްޓް މެދުވެރިކޮށް ރާއްޖެ ގެނެސްފައިވާ ޕާރުސަލްތައް ބަލައި ފާސްކުރުމުގެ ތެރޭގައި ކަމަށެވެ. އެގޮތުން ބަލައި ފާސްކުރެވުނު ޕާރުސަލްގެ ތެރެއިން ފެނުނު މަސްތުވާތަކެތި ފުރަތަމަ މަރުހަލާގައި ތަޙްލީލުކުރި އިރު، މަސްތުވާތަކެތީގެ ބާވަތެއް ކަމަށްވާ މެފެޑްރޯނަށް ޕޮޒިޓިވް ވެފައިވާ ކަމަށް ކަސްޓަމްސުން މަޢުލޫމާތުދެއެވެ.

މި އަތުލައިގަނެވުނު މަސްތުވާތަކެތީގެ ބަރުދަނުގައި ޕެކިނާއިއެކު 526 ގްރާމް ހުރިއިރު މިތަކެތީގެ މަގުމަތީ އަގު އެއްމިލިއަން ރުފިޔާއަށް އަރާކަމަށް ކަސްޓަމްސުން ބުނެއެވެ.

"މި މައްސަލައިގައި ޝާމިލްވާ ދިވެހި ފިރިހެނަކާއި އަތުލައިގަނެވުނު މަސްތުވާތަކެތ ކަމަށް ޝައްކުކުރެވޭ ތަކެތި މިހާރު ވާނީ އިތުރަށް ތަޙްލީލު ކުރުމަށްޓަކައި މޯލްޑިވްސް ޕޮލިސް ސަރވިސްއާ ޙަވާލުކުރެވިފައެވެ." ކަސްޓަމްސުން ބުނެފައިވެއެވެ.

ކަސްޓަމްސުން ބުނީ މިއީ މިއަހަރު ތެރޭގައި މިބާވަތުގެ މަސްތުވާތަކެތި ރާއްޖެ އެތެރެކުރަން އުޅެނިކޮށް އަތުލައިގަނެވުނު ދެވަނަ ފަހަރު ކަމަށެވެ. ފުރަތަމަ ފަހަރު މިބާވަތުގެ މަސްތުވާތަކެތި އަތުލައިގަނެފައިވަނީ ކުރިއަރ މެދުވެރިކޮށް ރާއްޖެ އެތެރެކޮށްފައިވާ ޕާރްސަލްތައް ބަލާފާސްކުރުމުގެ ތެރެއިން 2022 މާރޗް ފުރަތަމަ ދުވަހުއެވެ.

އެފަހަރު 585 ގްރާމްގެ މެފެޑްރޯން އަތުލައިގަނެފައިވާކަމަށް ކަސްޓަމްސުން ވަނީ ބުނެފައެވެ.