މޯލްޑިވްސް އިންލަންޑް ރެވެނިއު އޮތޯރިޓީ، މީރާގެ އޮފީސް ފަޅާލައި، ފައިސާތަކެއް ވަގަށް ނެގި މީހެއްގެ ބަންދަށް 45 ދުވަސް ކްރިމިނަލް ކޯޓުން ދީފިއެވެ.

މީރާގެ އޮފީސް ފަޅާލައި، ފައިސާތަކެއް ވަގަށް ނެގި މައްސަލައިގައި އިއްޔެ ހައްޔަރުކޮށްފައިވަނީ 30 އަހަރުގެ ދިވެހި ފިރިހެނެކެވެ.

ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން މި މައްސަލައާ ގުޅިގެން ހައްޔަރުކުރި މީހާއަކީ 2014 ވަނަ އަހަރުން ފެށިގެން 2022 ވަނަ އަހަރުގެ ޖުލައިމަހާއި ހަމައަށް ޖަލު ހުކުމެއް ތަންފީޒު ކުރަމުން ދިޔަ މީހެކެވެ. އޭނާ ޖަލު ހުކުމުން މިދިޔަމަހުގެ 19 ވަނަ ދުވަހު މިނިވަންވީއިރު، މީރާ ފަޅާލައި ވައްކަމެއް ކޮށްފައިވަނީ އޭގެ 21 ދުވަސް ފަހުންނެވެ.

ފިނޭންސް މިނިސްޓްރީ ހިންގާ އިމާރާތުގައި ހިންގާ މީރާގެ އޮފީހަށް ދަންވަރުގެ ވަގުތެއްގައި އޭނާ ވަނީ އިމާރާތުގެ ފުރަގަހުގެ ކުޑަ ދޮރެއް ތަޅާލައިގެންނެވެ.

މީރާއިން ބުނެފައިވަނީ އެ އޮފީހުގެ މުވައްޒަފަކު އަތުން ގެއްލުނު 25 ރުފިޔާ ފިޔަވައި އިތުރު އެއްވެސް ފައިސާއެއް ނަގާފައެއް ނުވާކަމަށެވެ.