މުދާ ބަރުކޮށްގެން ޅ.ކުރެންދޫ ނެރުމައްޗަށް ބީހުނު "މަޒި" ނަމަކަށް ކިޔާ މުދާ އުފުލާ ދޯންޏެއް، އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންގެ އެހީތެރިކަމާއެކު ރޭ ފުންކޮށްފިއެވެ.

މި ހާދިސާގެ މަޢުލޫމާތު އެމްއެންޑީއެފް މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ)އަށް ރޭ 20:00 ހާއިރު ލިބުމާއެކު އެމްއެންޑީއެފް ނޮދަން އޭރިއާ ކޯސްޓްގާޑު ފަސްޓް ސްކޮޑްރަންގެ ޑައިވަރުން ވަނީ ވަގުތުން ހަރަކާތްތެރިވާން ފަށާފައެވެ.

މިގޮތުން އެ ސަރަހަށްދަށް ގޮސް ދޯނީގެ ފަޅުވެރިންނާ ގުޅިގެން ނޮދަން އޭރިއާ ކޯސްޓްގާޑް ފަސްޓް ސްކޮޑްރަންގެ ޑައިވަރުން ކުރި މަސައްކަތުން ދޯނި ފުންކުރެވިފައި ވަނީ ރޭ 21:30 ހާއިރުއެވެ. މާލެއިން މުދާ ބަރުކޮށްގެން ޅ.ކުރެންދޫއަށް ދަތުރުކުރި މި ދޯނި ފަރަށް އަރާފައިވަނީ ޅ.ކުރެންދޫއަށް ވަންނަން އުޅުމުގެ ތެރޭގައެވެ.

ނުވަ ދިވެހިންނާއެކު ދަތުރުކުރި މި ދޯންޏަކީ 98 ފޫޓްގެ ދޯންޏެކެވެ. މި ހާދިސާގައި ދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައި ނުވާއިރު މި ދޯނި މިހާރު ވަނީ ޅ.ކުރެންދޫ ބަނދަރަށް ވައްދާފައެވެ.