ހޯމް ކަރަންޓީނުގެ މުއްދަތު އަލުން 14 ދުވަހަށް ބަދަލުކޮށް އެމުއްދަތު ހަމަވުމުން ޕީސީއާރު ޓެސްޓް ހަދާ ގޮތަށް ނިންމާފައިވާ ކަމަށް ނޭޝަނަލް އެމަޖަންސީ އޮޕަރޭޝަން ސެންޓަރު (އެންއީއޯސީ) ގެ ތަރުޖަމާނު މަބުރޫކް އަޒީޒު ވިދާޅުވެއްޖެއެވެ.

ދަރުބާރުގޭގައި މިރޭ އެންއީއޯސީއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތަރުޖަމާނު މަބްރޫކް އަޒީޒް ވިދާޅުވީ ރާއްޖެއިން ބޭރުން މާލެ އަންނަ މީހުންނާއި މާލޭ ސަރަހައްދުގެ ލޮކްޑައުންއާ ގުޅިގެން މާލޭގައި ތާށިވެފައި ތިބި މީހުން އަނބުރާ ރަށްރަށަށް ގެންގޮސް ގޭގައި ކަަރަންޓީންކުރުމަށް އުސޫލެއް އެކުލަވާލިއިރު އެގޮތަށް ގޭގައި ކަރަންޓީން ކުރުމުން އެ އެޕާޓްމަންޓެއް ނުވަތަ ގެއެއް މޮނިޓަރިންގެ ހާލަތަށް ގެންދެވޭ ކަމަށެވެ. އެހެންކަމުން މިހާރު ނިންމާފައި ވަނީ އެގޮތަށް ކަރަންޓީނުގައި ބޭތިއްބުމަށް ފަހު 14 ދުވަސް ހަމަވުމުން ޕީސީއާރު ޓެސްޓް ހެދުމަށް ކަމަށް މަބުރޫކް ވިދާޅުވިއެވެ.

"ޓެސްޓްގެ ނަތީޖާ ނެގެޓިވްވެއްޖެނަމަ ދޫކޮށްލުމަށް. މިގޮތުން 14 ދުވަސް ހަމަކުރުމަށް ފަހުގައި ޕީސީއާރު ޓެސްޓް ހެދުމަށް ނިންމައިފައިވޭ." މަބްރޫކް ވިދާޅުވިއެވެ.

މަބްރޫކް އިތުރަށް ވިދާޅުވީ އެގޮތަށް މީހުންގެ ސާމްޕަލް ނަގާނީ 15 ވަނަ ދުވަހު ކަމަށެވެ. އަދި އެއީ ރާއްޖޭގެ އެކި ކަންކޮޅުތަކުން ނެގޭ ސާމްޕަލްތަކެއް ކަމަށްވާތީ އެމީހުންގެ ސާމްޕަލްތަކުގެ ނަތީޖާ 18 ވަނަ ދުވަހާއި ހަމައަށް އެނގޭނެ ކަމަށް އޭނާ ވިދާޅުވި އެވެ. 

އެކަމަކު މި ދުވަސްވަރަކީ މޫސުން ގޯސް ދުވަސްވަރެއް ކަމަށްވާތީ ނަތީޖާ ލިބުމުގައި ވެސް ލަސްތަކެއް ހުރުން އެކަށީގެންވާ ކަން މަބުރޫކް ފާހަގަކުރެއްވިއެވެ. އެޗްޕީއޭއިން ކުރިން ހަމަޖައްސައިފައިވާ އުސޫލުގައި ބުނެފައިވަނީ މާލެ އިން ރަށްރަށައްދާ މީހުން 24 ދުވަހު ކަރަންޓީންގައި ހުންނަންޖެހޭނެ ކަމަށެވެ. އެހެން ނަމަވެސް މިއައި ބަދަލާއެކު ކަރަންޓީނުގައި ދެން ތިބެންޖެހޭނީ 14 ދުވަހުގެ މުއްދަތަކަށެވެ. މާލެ އިން ކަރަންޓީނަށް ރަށްރަށައް ފޮނުވަނީ ކޯވިޑް ގެ އެއްވެސް އަލާމާތެއް ނުހުންނަ މީހުންނެވެ.