ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން ގެނައި އިސްލާހުތަކުން ވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ހިކުމަތްތެރިކަން އެނގިގެން ދާކަމަށް ސްޓެލްކޯގެ މެނޭޖިން ޑިރެކްޓަރު އަޙްމަދު ޝަރީފް ވިދާޅުވެއްޖެއެވެ.

އއ. އަދި އދ. އަތޮޅުގެ ރަށްރަށުގެ މަގުބައްތިތައް ބެލެހެއްޓުން ސްޓެލްކޯއާއި ހަވާލު ކުރުމުގެ ފަހުމުނާމާގައި ސޮއި ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން، ޝަރީފް ވިދާޅުވީ، މިއަދު ސޮއިކުރެވިގެންދިޔަ ފަހުމުނާމާއަކީ، ރައީސް ޞާލިޙްގެ ލާމަރުކަޒީ ސިޔާސަތަށް ތާއީދުކޮށް އެ ސިޔާސަތު ދެމެހެއްޓުމަށްޓަކައި ގެތުނު އިތުރު ބޮޅެއް ކަމަށެވެ.

ޝަރީފް ވިދާޅުވީ، ރައީސް ޞާލިޙަކީ ލާމަރުކަޒީ ނިޒާމުން ރާއްޖެ ހިންގުމަށް ވަރަށް ހިކުމަތްތެރި ވިސްނުންފުޅަކާ ސިޔާސަތެއް ގެންގުޅުއްވާ ބޭފުޅެއްކަމަށެވެ. އަދި އެމަނިކުފާނު ވެރިކަމަށް ވަޑައިގެންނެވިފަހުން ފުރަތަމަ އިސްލާހު ހުށަހެޅުއްވި ގާނޫނުތަކުގެ ތެރޭގައި ލާމަރުކަޒީ ގާނޫނު ހިމެނޭ ކަމަށާ، އެ ގާނޫނަށް ގެނެސްދެއްވި އިންގިލާބީ ބަދަލުތަކަކީ، ކައުންސިލްތަކާ އަތޮޅުތެރޭގެ ރައްޔިތުން، ހާއްސަކޮށް ކަނބަލުންނަށް ބާރުވެރިކަން އިހުސާސް ކޮށްދޭފަދަ އިސްލާހުތަކެއް ކަމަށެވެ.

ޝަރީފް މިފަދައިން ވިދާޅުވެފައިވާއިރު، ރައީސް ޞާލިޙްގެ އެންމެ ބޮޑު އެއް ސިޔާސަތަކީ ލާމަރުކަޒީ ނިޒާމު އެންމެ އެކަށީގެންވާ ގޮތެއްގައި ހިންގުމެވެ. އެގޮތަށް އެކަން ކުރުމަށްޓަކައި ގާނޫނަށް ގެންނަންޖެހޭ އިސްލާހުތައް އަދިވެސް ގެންނަވަން ތައްޔާރަށް ހުންނެވިކަމަށް ރައީސް ޞާލިޙް މީގެ ކުރިން ވަނީ ވިދާޅުވެފައެވެ.