ފަތުރުވެރިކަމުގެ ރަންޔޫބީލް ފާހަގަކުރުމަށް ދުނިޔޭގެ ރެކޯޑެއް ޤާއިމްކުރުމުގެ ހަރަކާތެއް މިއަދު ރާއްޖޭގައި ބޭއްވުމަށް ހަމަޖެހިއްޖެއެވެ.

މިއީ އެންމެ ގިނަ މީހުން އެއްފަހަރާ، އެއް ވަގުތެއްގައި ކަނޑުއަޑީގައި ވަކިވަގުތެއް ހަމަވަންދެން ނޭވާ ހިފަހައްޓާލައިގެން ޤާއިމްކުރާ ރެކޯޑެވެ. މި ރެެކޯޑް ޤާއިމްކުރުމުގެ ހަރަކާތް ފެށުމަށް ހަމަޖެހިފައިވަނީ މިއަދު ހަވީރު 4:30 ގައެވެ.

އެއް ސަރަހައްދަށްވުރެ ގިނަ ސަރަހައްދުތަކުގައި ކުރިއަށްދާ މި ހަރަކާތުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ސަރުކާރުގެ އިސްވެރިންވެސް ބައިވެރިވެވަޑައިގަތުމަށް ވަނީ ހަމަޖެހިފައެވެ.

"ފްރީޑައިވް މޯލްޑިވްސް"އިން އިންތިޒާމުކުރާ "ނޭވާ 2" ޙަރަކާތަކީ ރާއްޖޭގެ ފަތުރުވެރިކަމުގެ ރަން އަހަރާއި ދިމާކޮށް ރާއްޖޭގެ ނަން "ގިނީސް ވޯލްޑް ރެކޯޑް" ފޮތަށް އެރުވުމަށް ހިންގާ ބޮޑު ހަރަކާތެކެވެ.

މިއަހަރުގެ ޙަރަކާތުގައި ގާތްގަނޑަކަށް 400 އާއި ގާތްކުރާ ޢަދަދަކަށް މީހުން ބައިވެރިވާނެކަމަށް ޙަރަކާތް އިންތިޒާމުކުރާ "ފްރީޑައިވް މޯލްޑިވްސް" ލަފާކުރެއެވެ. މިޙަރަކާތް ރާއްޖޭގެ 12 ރިސޯޓެއްގައި ކުރިއަށްގެންދިޔުމަށް ވަނީ ހަމަޖެހިފައެވެ.

2019 ވަނަ އަހަރު ކުރިއަށްގެންދިޔަ މީގެ ފުރަތަމަ ޙަރަކާތުގައި ރާއްޖެއިންވަނީ ފްރީ ޑައިވް ކުރުމުގެ ވޯލްޑް ރެކޯޑެއް ޤާއިމްކޮށްފައެވެ. އެފަހަރުގެ ހަރަކާތުގައި 521 މީހުން ވަނީ ބައިވެރިވެފައެވެ.

ރާއްޖޭގެ ޓޫރިޒަމުގެ ރަން ޔޫބީލާ ގުޅުވައިގެން މިއަހަރު މިޙަރަކާތް ހިންގުމުގެ އެންމެ ބޮޑު އެއް ބޭނުމަކީ ރާއްޖެއަކީ ފްރީޑައިވް ކުރުމަށް މަޤްބޫލް މަންޒިލެއްގެ ގޮތުގައި ޕްރޮމޯޓް ކުރުންކަމަށް ފްރީޑައިވް މޯލްޑިވްސްއިން ބުނެފައިވެއެވެ. އަދި މިހަރަކާތުގެ ތެރެއިން ދުނިޔޭގެ ސަމާލުކަން ރާއްޖެއަށް ހޯދުމަކީވެސް މަޤްސަދެއްކަމަށް "ނޭވާ 2" ހަރަކާތް އިންތިޒާމްކުރާ ފަރާތުން ބުނެއެވެ.