އިންޑިއާގެއެހީގައި ރާއްޖޭގައި ހިންގާ ޕްރޮޖެކްޓްތަކުގައި ދިވެހިންނަށް ބައިވެރިނުވެވޭތީ އެމްއެންޕީން ކަންބޮޑުވުން ފާޅުކޮށްފިއެވެ.

މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބު ރައީސް އަޙްމަދު ޝަރީފް މިއަދު ވިދާޅުވީ އެޕާޓީގެ ރައީސް ކާނަލް ރިޓަޔަރޑް މުޙައްމަދު ނާޒިމް މިއަދުގެ ވަގުތެއްގައި އިންޑިއާގެ ފޮރިން ސެކްރެޓަރީ ވިނޭ މޯހަން ކްވަތުރާއާއި ބައްދަލުކުރަށްވާފައިވާ ކަމަށެވެ.

އެ ބައްދަލުކުރެއްވުމުގައި މަޝްވަރާކުރެވުނު ކަންތައްތަކުގެ ތެރޭގައި އިންޑިއާގެ ލޯނުތަކާއި ހިލޭ އެހީގައި ހިންގޭ ޕްރޮޖެކްޓްތަކުގައި ދިވެހިންނަށް ބައިވެރިވެވޭ މިންވަރުގެ ކުޑަކަމާއި ރާއްޖޭގެ ދަރަނި އިތުރުވަމުންދިއުމުގެ ކަންބޮޑުވުން ހިއްސާ ކުރެއްވިކަމަށް ޝަރީފް ވިދާޅުވިއެވެ.

"ވިދާޅުވި އިންޑިއާ އެގްޒިމް ބޭންކްގެ ލޯނުތަކުން ހިންގޭ ޕްރޮޖެކްޓްތަކުން ދިވެހިންނަށް ފުރުސަތު ނެތްކަމާއި ޕްރޮޖެކްޓްތަކުގެ ތެރެއިން ކަނޑައެޅޭ ޕަސެންޓޭޖްވެސް ދިވެހިންގެ ކުންފުނިތަކަށް ނުލިބޭކަމަށް." ޝަރީފް ވިދާޅުވިއެވެ.

މި ބައްދަލުކުރެއްވުމުގައި އެމްއެންޕީގެ ލީޑަރ މުޙައްމަދު ނާޒިމްވަނީ ސަރުކާރުގެ ޢަމަލުތަކުގެ ސަބަބުން ރާއްޖެއާއި އިންޑިއާގެ ގުޅުން ހީނަރުވާކަމަށް އިންޑިއާގެ ފޮރިން ސެކްރެޓަރީއަށް ދަންނަވާފައެވެ.

މިއީ އިންޑިއާގެ ފޮރިން ސެކްރެޓަރީ މޯހަން ކްވަތުރާ މަގާމާއި ހަވާލުވެވަޑައިގަތުމަށްފަހު ރާއްޖެއަށް ކުރެއްވި ފުރަތަމަ ރަސްމީ ދަތުރުފުޅެވެ.