ހުޅުމާލޭ ހޮސްޕިޓަލުގެ މެންޓަލް ހެލްތު ސެންޓަރ ރަސްމީކޮށް ހުޅުވައިިފިއެވެ.

ދުނިޔޭގެ ނަފްސާނީ ޞިއްޙަތުގެ ދުވަސް ފާހަގަކުރުމަށް މިއަދު ހެނދުނު ބޭއްވި ރަސްމިއްޔާތެއްގައި މި ސެންޓަރު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހްމަދެވެ. މިދުވަހުގެ ޝިއާރެއްގެގޮތުގައި މިއަހަރު ކަނޑައަޅާފައިވަނީ "މޭކް މެންޓަލް ހެލްތު ފޯރ އޯލް އަ ގްލޯބަލް ޕްރައޮރިޓީ"އެވެ.

މި ސެންޓަރުން ކައުންސިލިން އާއި ތެރަޕީތައް ދިނުމުގެ އިތުރު ގުރޫޕް ކައުންސިލިން ސެޝަންތައްވެސް ނަގައިދޭނެ އެވެ. ދެ ކޮޓަރިއާއި ދެ ކޮންފަރެންސް ރޫމް ހިމެނޭ މި ސެންޓަރުން ޚިދުމަތް ފޯރުކޮށްދިނުމަށް މިވަގުތު 2 ސައިކޭޓްރިސްޓުންނާއި 2 ކްލިނިކަލް ސައިކްލޮޖިސްޓުންނާއި 1 ކައުންސިލަރު ހަރަކާތްތެރިވަމުންދާނެކަމަށް ސަރުކާރުން މަޢުލޫމާތު ދީފައިވެއެވެ.

މި ސެންޓަރުގެ ޚިދުމަތް ހެނދުނު އަށަކުން ރޭގަނޑު ދިހައަކަށް ފޯރުކޮށްދޭއިރު ސެންޓަރުގެ ކޯލް ސެންޓަރުގެ ޚިދުމަތް 24 ގަޑިއިރު ލިބޭނެއެވެ.

ހުޅުމާލޭ ހޮސްޕިޓަލުގެ މެންޓަލް ހެލްތު ސެންޓަރ މިއަދު ހުޅުވާފައިވާއިރު، ނަފްސާނީ ބަލިތަކަށް ޚާއްސަ މަރުކަޒެއް ރާއްޖޭގައި ޤާއިމުކުރުމަކީ ރައީސް ޞާލިޙްގެ ރިޔާސީ ވަޢުދުފުޅެކެވެ. އެވަޢުދުގެ ދަށުން 2019 މާރޗް 25 ވަނަ ދުވަހު ސަރުކާރުންވަނީ ރާއްޖޭގައި މުޅިން އަލަށް ނަފްސާނީ ބަލިތަކަށް ފަރުވާކުރާނޭ ޚާއްސަ މަރުކަޒެއް ޤާއިމުކޮށްފައެވެ. މި ސެންޓަރު ޤާއިމުކޮށްފައިވަނީ އައިޖީއެމްއެޗުގައެވެ.

އެސެންޓަރުގެ ތަފާސް ހިސާބުތައް ދައްކާގޮތުން މިހާތަނަށް އެ ސެންޓަރުން ވަނީ ބައިލައްކައަށްވުރެ ގިނަ މީހުން ޚިދުމަތް ހޯދާފައެވެ. ހަމައެއާއެކު ސަރުކާރުންވަނީ ނަފްސާނީ ބަލީގެ ފަރުވާތައް އާސަންދަ މެދުވެރިކޮށް ލިބޭނެ އިންތިޒާމުވެސް ހަމަޖައްސާފައެވެ.