މިދިޔަ މަހުގެ ނިޔަލަށް ބައިލައްކަ މީހުން އައިޖީއެމްއެޗުގެ ނަފްސާނީ ބަލިތަކާއި ބެހޭ ސެންޓަރުން ފަރުވާ ހޯދާފައިވާ ކަމަށް އެ ސެންޓަރުގެ ތަފާސްހިސާބުތަކުން ދައްކައިފިއެވެ.

ނަފްސާނީ ބަލިތަކަށް ފަރުވާދޭ ޚާއްސަ މަރުކަޒެއް ރާއްޖޭގައި ޤާއިމުކުރުމަކީ ރައީސް ޞާލިޙްގެ ރިޔާސީ ވަޢުދުފުޅެކެވެ. އެވަޢުދުގެ ދަށުން 2019 މާރޗް 25 ވަނަ ދުވަހު ސަރުކާރުންވަނީ ރާއްޖޭގައި މުޅިން އަލަށް ނަފްސާނީ ބަލިތަކަށް ފަރުވާކުރާނޭ ޚާއްސަ މަރުކަޒެއް ޤާއިމުކޮށްފައެވެ. މި ސެންޓަރު ޤާއިމުކޮށްފައިވަނީ އައިޖީއެމްއެޗުގައެވެ. އޭގެ އިތުރުން މިއަދު ހުޅުމާލޭ ހޮސްޕިޓަލުގައިވެސް ވަނީ މެންޓަލް ހެލްތު ސެންޓަރެއް ހުޅުވާފައެވެ.

ބައިނަލްއަޤުވާމީ ނަފްސާނީ ދުޅަހެޔޮ ކަމުގެ ދުވަހާއި ގުޅިގެން ސަރުކާރުން މިއަދު ޢާއްމުކޮށްފައިވާ ތަފާސްހިސާބުތައް ދައްކާގޮތުން 2019 ވަނަ އަހަރު ނަފްސާނީ ބަލިތަކަށް ފަރުވާދޭ ޚާއްސަ މަރުކަޒު ހުޅުވި ފަހުން މިދިޔަ މަހުގެ ނިޔަލަށް ނަފްސާނީ ބަލީގައި އެ ސެންޓަރަށް ޑޮކްޓަރަށް ދެއްކި މީހުންގެ އަދަދު ވަނީ 55،608 އަށް އަރާފައެވެ. އަދި މި އަހަރުގެ ތެރޭގައި އެކަނިވެސް 13،718 މީހުން ވަނީ ބައްޔަށް ފަރުވާ ހޯދާފައެވެ.

މިއަހަރު ފެށުނުއިރު އެ ސެންޓަރުގައި ޑޮކްޓަރަށް ނުދެއްކި ކިޔޫގައި 3200 މީހުން ތިއްބެވެ. އެކަމަށް ޙައްލެއް ހޯދުމަށް މިދިޔަ ޖުލައި މަހުން ފެށިގެން އެ ތަނުގައި ހިދުމަތް ދޭ ޑޮކްޓަރުންގެ އަދަދު ވަނީ ހަތަރަކުން އަށަކަށް އިތުރުކޮށްފަ އެވެ. ނަތީޖާއެއްގެ ގޮތުން ޑޮކްޓަރަށް ނުދެއްކި މިވަގުތު ކިޔޫގައި ތިބީ 556 މީހުން ކަމަށް ސަރުކާރުންވަނީ ބުނެފައެވެ.

ނަފްސާނީ ބަލިތަކަށް ފަރުވާދޭ ޚާއްސަ މަރުކަޒުގައި މި އަހަރު 125 މީހަކަށް އެނދުމަތިކޮށްގެން ވަނީ ފަރުވާ ދީފައެވެ. މި އަދަދު މިދިޔަ އަހަރު ހުރީ 232 ގައެވެ.

ސަރުކާރުން ވަނީ 2020 ވަނަ އަހަރުގެ ފެބްރުއަރީ މަހުގެ އެއް ވަނަ ދުވަހުން ފެށިގެން، އަމިއްލަ ކްލިނިކްތަކާއި ހޮސްޕިޓަލްތަކުން ފޯރުކޮށްދޭ ނަފްސާނީ ބަލީގެ ބައެއް ފަރުވާތަކަަށް، އާސަންދަ ދޭން ފަށާފައެވެ. ހަމައެއާއެކު މާލޭގެ އިތުރުން ރާއްޖޭގެ އިތުރު ސަރަޙައްދުތަކުގައި ނަފްސާނީ ބަލިތަކަށް ފަރުވާދޭ ޚާއްސަ މަރުކަޒުތައް ގާއިމް ކުރުމުގެ މަސައްކަތް ކުރަމުން އަންނަކަން ރައީސް އޮފީހުން ހާމަކޮށްފައިވެއެވެ.