މަސްވެރިކަމުގެ ސިނާޢަތު އިތުރަށް ދިރާސާކޮށް ފައިދާހުރި ސިނާޢަތަކަށް ބަދަލުކުރުމަށް މޯލްޑިވްސް ނެޝަނަލް ޕާޓީގެ ނައިބު ރައީސް އަޙްމަދު ޝަރީފް ގޮވާލައްވައިފިއެވެ.

ޝަރީފް މިގޮތަށް ގޮވާލެއްވީ، 2016 އިން 2021 އަށް ސަރުކާރުގެ މަސްކުންފުނި މިފްކޯއަށް 1 ބިލިއަން ރުފިޔާގެ ގެއްލުންވެފައިވާކަމަށް އޮޑިޓަރ ޖެނެރަލް ވިދާޅުވުމާ ގުޅިގެންނެވެ.

މިފްކޯގެ ގެއްލުމުގެ އަގު މިހާރު 1.3 ބިލިއަން ރުފިޔާއަށް އަރާފައިވާތީ، ޝަރީފް ވިދާޅުވީ ސަރުކާރުގެ ކުންފުނިތައް ގެއްލުމުގައި ހިންގާނަމަ އެކަމުގެ ބުރަ އުފުލަން ޖެހޭނީ ރައްޔިތުން ކަމަށެވެ. އެހެންކަމުން މަސްވެރިކަމުގެ ސިނާޢަތު އިތުރަށް ދިރާސާކޮށް ފައިދާހުރި ސިނާޢަތަކަށް ބަދަލުކުރުމަށް ޝަރީފްވަނީ ގޮވާލަށްވާފައެވެ.

"ޓެކްސް އިތުރަށް ނެގުމުގެ ބަދަލުގައި މިކަން އިސްލާޙު ކުރޭ." ޝަރީފް ވިދާޅުވެފައިވެއެވެ.

މިފްކޯގެ އޮޑިޓް ރިޕޯޓުގައި ބުނެފައިވަނީ އެކުންފުނީގައިހުރި ހަރުމުދަލުގެ އަގަށްވުރެ ކުންފުނީގެ ދަރަނި ވަނީ 955 މިލިއަން ރުފިޔާއިން އިތުރުވެފައިކަމަށެވެ.

އަދި މިފްކޯއަށް ގެއްލުންވަމުން ދިއުމާއި ގުޅިގެން ދައުލަތުގެ ބަޖެޓުން 2016 އިން ފެށިގެން 2021 ވަަނަ އަހަރަގެ ނިޔަލަށް ޖުމްލަ 701 މިލިއަން ރުފިޔާ ދޫކޮށްފައިވާކަމަށްވެސް ރިޕޯޓްގައިވެއެވެ.