އަސާސީ ހިދުމަތްތައް ފޯރުކޮށްދިނުމަށް އިދިކޮޅު ޕާޓީތަކުން ވާންޖެހޭ ވަޢުދެއް ނޯންނާނެ ކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިއުވާން ވިދާޅުވީ އަސާސީ ޚިދުމަތްތައް މިސަރުކާރުން ދަނީ ފޯރުކޮށްދެމުން ކަމަށާއި ރައްޔިތުންނަށް ބޭނުންވާ އަސާސީ ހިދުމަތްތައް ރައީސް ޞާލިޙުގެ ފަސް އަހަރުގެ ވެރިކަން ނިމޭއިރު ހުންނާނީ ފުދިފައި ކަމަށެވެ.

މިއުވާން ވިދާޅުވީ ރައީސް ޔާމީން އަތޮޅުތެރޭގެ ރަށްރަށުގައި ބާއްވަވާ ބައްދަލުވުން ތަކުގައިވެސް ފަހަތުން ފެންނަނީ މާލެ ސަރަހައްދަށް ކޮށްދެއްވި ކަންކަމުގެ ފޮޓޯތަކެއް ކަމަށެވެ. އެހެންކަމުން އެމަނިކުފާނަށް ދެވަނަ ދައުރެއް ލިބިވަޑައިގެންނެވި ނަމަވެސް އަތޮޅުތެރޭގެ ތަރައްޤީއަށް ކަމެއްކޮށްދެއްވާނެކަމަށް ރައްޔިތުން ޤަބޫލުނުކުރާނެ ކަމަށް މިއުވާން ވިދާޅުވިއެވެ.

“މިކަން ކަމަށް އެބޭފުޅުން ވައުދުވެވަޑައިގަންނަވާކަން ނުޖެހޭނެ. އަޅުގަނޑުމެން ސަރުކާރުން އެކަން ކޮށްދެމުން މިދަނީ.” މިއުވާން ވިދާޅުވިއެވެ.

ރައީސް ޔާމީން ވަނީ ދާދިފަހުން ތިލަދުންމަތީގެ ބައެއް ރަށްތަކަށް ވަޑައިގެންފައެވެ. އަދި އެމަނިކުފާނު ގެންދަވަނީ ރާއްޖޭގެ އެހެން ސަރަޙައްދުތަކަށް ޒިޔާރަތް ކުރެއްވުމަށްވެސް ތައްޔާރުވެވަޑައިގަންނަވަމުންކަމަށް ޕީޕީއެމުން މަޢުލޫމާތު ދީފައިވެއެވެ.