ޗައިނާއަކީ ރާއްޖޭގެ ތަރައްގީގެ އެންމެ ބޮޑު އެއް ބައިވެރިޔާކަމަށާއި، ރާއްޖެއާއި ޗައިނާގެ ގުޅުން ކުރިމަގުގައިވެސް މިގޮތުގައި ދެމިއޮންނާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ޗައިނާއާއި ރާއްޖެއާއި ދެމެދު ސިޔާސީ ގުޅުން ގާއިމުކުރިތާ 50 އަހަރު ފުރުން ފާހަގަކުރުމަށް، ޗައިނާ އެމްބަސީން މިއަދު ބޭއްވި ރަސްމިއްޔާތުގައި ބައިވެރިވެވަޑައިގެން ވާހަކަފުޅުދައްކަވަމުންނެވެ.

ރައީސް ވިދާޅުވީ ސިޔާސީ ގުޅުން ގާއިމުކުރުމުގެ ކުރީގައިވެސް ޗައިނާގެ އެހީތެރިކަން ރާއްޖެއަށް ލިބެމުން އައިކަމަށެވެ. ނަމަވެސް ސިޔާސީ ގުޅުމަށްފަހުގައި، ހާއްސަކޮށް ވޭތުވެދިޔަ 30 އަހަރަކީ ޗައިނާގެ ބޮޑެތި އެހީތަކެއް ރާއްޖެއަށް ލިބިގެންދިޔަ އަހަރުތަކެއްކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ، އުމްރާނީގޮތުން ރާއްޖޭގެ ތަރައްގީގެ އެންމެ މުހިންމު އެއް ބައިވެރިއަކީ ޗައިނާ ކަމަށާއި މީގެ 30 އަހަރު ކުރިން ޗައިނާގެ އެހީގައި މާލޭގައި ކުރިއަށްގެންދިޔަ ބޯހިޔާވަހިކަމުގެ ބޮޑު މަޝްރޫއު، "ސިނަމާލެ ފްލެޓް" މަސައްކަތަކީ ޗައިނާގެ މިފަދަ ބޮޑެތި އެހީތަކުގެ ފެށުންކަމަށެވެ.

"ޗައިނާ މޯލްޑިވްސް ފްރެންޑްޝިޕް ބްރިޖާ، ހިޔާ 7000 ޔުނިޓާއި ވެލާނާ އެއަރޕޯޓްގެ މަސައްކަތަކީ ރާއްޖެއަށް މުހިންމު މަސައްކަތްތަކެއް. އަދި ޗައިނާގެ އެހީގައި ރާއްޖޭގެ ފޮރިން މިނިސްޓްރީގެ އިމާރާތް ޒަމާނީކޮށް ބަދަލުކުރުމާއި މިހާރު ފަށަށާފައިވާ، ރަށްރަށަށް ސާފު ފެން ފޯރުކޮށްދިނުމުގެ މަސައްކަތްތައް ފާހަގަކޮށްލެވޭ." ރައީސް ވިދާޅުވިއެވެ.

ދަރުބާރުގޭގައި ބޭއްވި މި ރަސްމިއްޔާތުގައި، ޗައިނާގެ މިނިވަން ދުވަހާއި ގުޅުވައިގެން އެ ގައުމުގެ ރައީސް ޝީޖިންގޕިން އަށާއި، ޗައިނާގެ ރައްޔިތުންނަށް ރައީސް ވަނީ މަރުހަބާ ވިދާޅުވެފައެވެ.

ރާއްޖެއާއި ޗައިނާއާއި ދެމެދު ސިޔާސީ ގުޅުން ޤާއިމުކޮށްފައިވަނީ 1972ވަނަ އަހަރުއެވެ.