ޓެކްސް ބޮޑުކުރަނީ ރާއްޖެ އެތެރެއިން އާމްދަނީ އިތުރުކުރެވޭނެ ގޮތްތައް ހޯދުމަށްކަމަށް މާލީ ވަޒީރު އިބްރާހިމް އަމީރު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ އަމީރު ވިދާޅުވީ ދުނިޔޭގެ އިޤްތިޞާދީ ޙާލަތު މިހާރުއޮތްގޮތުން ރާއްޖޭން ބޭރަށް ގޮސް ފައިސާ ހޯދުމުގެ އެއްވެސް ފުރުސަތެއް މިހާރު ނެތް ކަމަށެވެ. އެހެންކަމުން އާމްދަނީ ހޯދޭނެ ގޮތްތަކެއް ގައުމުގެ އެތެރެއިން ހޯދަންޖެހޭ ކަމަށާއި އެގޮތްތަކަކީ ޓެކްސް ބޮޑު ކުރުން ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ލިބޭ އާމްދަނީން ރިކަރަންޓް ޚަރަދުތައް ހަމަޖެއްސުމަކީ ސަރުކާރުގެ ފިސްކަލް ޕޮލިސީގެ އެއް އަމާޒު ކަމަށާއި އެކަން މަޖިލީހަށް ހުށަހަޅާފައިވާ ފިސްކަލް ސްޓްރެޓެޖީގައިވެސް ބަޔާންކޮށްފައިވާނެ ކަމަށެވެ.

"ދުނިޔޭގެ ބާޒާރުން އަޅުގަނޑުމެންނަށް ފައިނޭންސަސް ހޯދުމުގައި މިހާރު މިހިރީ ގާތްގަނޑަކަށް ހަމަ ވަރަށް ބޮޑުތަނުން ދޮރުތައް ބަންދުވެފައި،" މިނިސްޓަރ އަމީރު ވިދާޅުވިއެވެ.

މިނިސްޓަރ މިއަދު ވިދާޅުވީ ވިދާޅުވީ އާމްދަނީ އިތުރު ނުކުރެވޭ ނަމަ ޕީއެސްއައިޕީ ގިނަ މަޝްރޫޢުތައް ހުއްޓާލަން ޖެހިދާނެ ކަމަށެވެ. އޭގެ ސަބަބުން އިގުތިސާދު ކުރިއަރާ މިންވަރު ދަށްވެ، އިޤްތިޞާދު ފަހަތަށް ސޮއްސާލާނެކަމަށް އަމީރު މިއަދު ވިދާޅުވިއެވެ.

ދަޢުލަތުގެ މާލީ އިދާރާއިން މަޖިލީހަށް ހުށަހެޅި އިސްލާޙުގައިވަނީ ޖީއެސްޓީ 6 އިންސައްތައިން 8 އިންސައްތައަށް ބޮޑު ކުރުމަށެވެ. އަދި ޓީޖީއެސްޓީ 12 އިންސައްތައިން 16 އިންސައްތައަށް ބޮޑު ކުރުމަށް އިސްލާޙުގައިވެއެވެ.

ދާދިފަހުން ވޯލްޑު ބޭންކުން ނެރުނު މޯލްޑިވްސް ޕަބްލިކް އެކްސްޕެންޑިޗާ ރިވިއު (ޕީއީއާރު) ރިޕޯޓުގައި ވަނީ ސަރުކާރުގެ މިނިންމުމަށް ތާއީދުކޮށްފައެވެ.