އާންމު ސިއްހަތުގެ ކުއްލި ނުރައްކަލުގެ މި ހާލަތުގައި، ރައްޔިތުންގެ ރައްކާތެރިކަން އިސްކޮށް، ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ އެންގުންތަކާ ޚިލާފުނުވުމަށް ފުލުހުން އިލްތިމާސްކޮށްފިއެވެ.

ފުލުހުން މިކަމަށް އިލްތިމާސް ކޮށްފައިވަނީ ބައެއް ފަރާތްތަކުން މާލޭގައި މުޒާހަރާ ކުރަން ރާވަމުން އަންނަ ދަނޑިވަޅެއްގައެވެ. ފުލުހުންގެ އިދާރާ އިން މިއަދު ބުނީ، މިހާރު ހިނގަމުންދާ ސިއްހީ ކުއްލި ނުރައްކަލުގެ ހާލަތުގައި އެންމެ ގިނަވެގެން ތަންތަނަށް އެއްވެ އުޅެވޭނީ ތިން މީހުންނަށް ކަމަށެވެ. އެކެމަކު، ބައެއް ފަރާތްތަކުން އެ އެންގުމާ ޚިލާފަށް އެއްވުން ބޭއްވުމަށް ރާވަމުންދާ ކަމަށް ފުލުހުން ބުނެއެވެ.

އެހެންކަމުން އެޗްޕީއޭގެ އިރުޝާދުތަކާ ޚިލާފުނުވެ، އެޗްޕީއޭގެ އެންގުންތަކާ އެއްގޮތަށް އަމަލު ކުރުމަށް ފުލުހުން މިއަދު ވަނީ އިލްތިމާސް ކޮށްފައެވެ.

ކޯވިޑް-19 އާ ގުޅިގެން މާލޭގައި އިއުލާންކޮށްފައިވާ ފުރަބަންދު އުވައި ނުލާ ކަމަށާއި ހަމައެކަނި ދީފައި ވަނީ ލުއިތަކެއް ކަމަށް އެޗްޕީއޭ އިން މީގެކުރިން ވަނީ ބުނެފައެވެ. އަދި ތިން މީހުންނަށް ވުރެ ގިނަ މީހުން މަގުމަތީގައި އެކީގައި އުޅުމަކީ އަދިވެސް މަނާކަމެކެވެ. ބޭރަށް ނުކުންނަ އިރު، ގައިޑްލައިންތަކަށް ބޯލަނބައި އަދި ގައިދުރުކަން ބެހެއްޓުމަށް ސަމާލުކަން ދޭން ވާނެ ކަމަށް އެޗްޕީއޭއިން އިރުޝާދު ދީފައި ވެއެވެ. ބަލިކޮންޓްރޯލް ކުރުމަކީ ހެލްތު މިނިސްޓްރީ އާއި އެޗްޕީއޭ ނުވަތަ ނެޝަނަލް އިމަޖެންސީ އޮޕަރޭޝަންސް ސެންޓަރަށް އެކަނި ކުރެވޭނެ ކަމެއް ނޫންކަން އެޗްޕީއޭ އިން ފާހަގަ ކުރެއެވެ. އަދި ބަލި ފެތުރުން ކޮންޓްރޯލް ކުރެވޭނީ އެންމެން އެކުގައި ގުޅިގެން މަސައްކަތް ކޮށްގެންކަން ވެސް އެޗްޕީއޭ އިން ފާހަގަކުރެއެވެ.

މިހާރު ހުއްދަ ނެތި ބޭރުގައި އުޅެވޭނީ ފަތިހު 05:00 އިން ރޭގަނޑު 22:00 އަށެވެ. ފުރަބަންދަށް ލުއިތައް ދިން ނަމަވެސް އެއީ އާންމު ހާލަތަށް ދާން ދިން ލުޔެއް ނޫން ކަމަށާއި ޒަރޫރީ ބޭނުމަށް ނޫނީ ގެއިން ނުނިކުންނަން ވެސް އެޗްޕީއޭ އިން ވަނީ އިލްތިމާސްކޮށްފައެވެ.