ރާއްޖޭގައި މިހާރުވެސް 22 މީހަކު އެއިޑްސް ބައްޔަށް ފަރުވާކުރަމުން އަންނަކަމަށް ހެލްތު މިނިސްޓްރީގެ ރެކޯޑުތަކުން ދައްކައިފިއެވެ.

އެއިޑްސް ބައްޔަކީ އިންސާނާގެ ހަށިގަނޑުގެ ދިފާޢީ ބާރު އެވައިރަސްގެ ސަބަބުން ދަށްކޮށްލާ ނުވަތަ ނައްތާލާ ވައިރަހެކެވެ. މީގެ ސަބަބުން އެކިއެކި ޖަރާސީމްގެ ސަބަބުން ޖެހޭ ބަލިތަކުން ދިފާޢުނުވެ، ހަށިގަނޑުގައި ބަލި ފެތުރެމުންދެއެވެ. މިބަލި ޖެހޭ މީހުން މުޖްތަމައުން އެކަހެރިކޮށް ދުރުކޮށްލުމަކީ އާންމުކަމެކެވެ.

ދުނިޔޭގެ އެއިޑްސް ދުވަސް މިއަދު ފާހަގަކުރަމުން ދާއިރު ހެލްތު މިނިސްޓްރީގެ ތަފާސްހިސާބުތަކުން ދައްކާގޮތުން ރާއްޖޭގައި މިދިޔަ އަހަރުގެ ނިޔަލަށް މިބަލި ޖެހުނު މީހުންގެ ޢަދަދުވަނީ 39 އަކަށް އަރާފައެވެ. މީގެތެރޭގައި ހިމެނެނީ 6 އަންހެނުންނާއި 33 ފިރިހެނުންނެވެ.

ރާއްޖޭން އެންމެ ފުރަތަމަ އެއިޑްސް ބަލި ފެނިފައިވަނީ 1991 ވަނަ އަހަރުއެވެ. ތަފާސްހިސާބުތައް ދައްކާގޮތުން ރާއްޖޭގައި އެއިޑް ޖެހިފައިވާ މީހުންގެ ތެރެއިން 15 މީހުން މިހާރުވަނީ ނިޔާވެފައެވެ.

ރައްކާތެރި ނޫންގޮތުގައި ޖިންސީ ގުޅުން ހިންގުމާއި މަސްތުވާތަކެތި ބޭނުންކުރުމުގައި ސިރިންޖު ފަދަ ތަކެތި ބޭނުންކުރުމުގެ ސަބަބުން އެއިޑްސް ބަލި މުޖުތަމަޢުގެ ތެރޭގައި އިތުރަށް ފެތުރުމުގެ ފުރުސަތު ބޮޑުކަމަށް ހެލްތު މިނިސްޓްރީން ބުނެއެވެ.

އެއިޑްސް ބައްޔަށް ދެވޭ ފަރުވާއަކީ އެންޓިރެޓްރޯ ވައިރަލް ޓްރީޓްމަންޓެވެ. މިއީ މުޅި ދުނިޔޭގައިވެސް ހިލޭ ފޯރުކޮށްދޭ ފަރުވާއެކެވެ. 2004ވަނަ އަހަރުން ފެށިގެން މިފަރުވާ އަންނަނީ ރާއްޖޭގައިވެސް ދެމުންނެވެ.