މިއަހަރުގެ މިހާތަނަށް 1.49 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމަށް ފަތުރުވެރިކަމާބެހޭ ވުޒާރާއިން ހާމަކޮށްފިއެވެ.

ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން މި އަހަރުގެ މިހާތަނަށް ޖުމްލަ 1.49 މިލިއަން ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ. މިދިޔަ އަހަރު މި މުއްދަތުގައި ރާއްޖެއަށް ޒިޔާރަތް ކުރީ 1.15 މިލިއަން ފަތުރުވެރިންނެވެ. ކޮވިޑްގެ ކުރިން އެޢަދަދު ހުރީ 1.53 ގައެވެ.

މިދިޔަ މަހު ރާއްޖެއަށް ޖުމްލަ 146,879 ފަތުރުވެރިން ވަނީ ޒިޔާރަތް ކޮށްފައެވެ. ތަފާސްހިސާބުތަކަށް ބަލާއިރު މިއަހަރު އެންމެ ގިނައިން ރާއްޖެއަށް ޒިޔާރަތްކުރީ އިންޑިއާ ފަތުރުވެރިންނެވެ. ދެން އެންމެ ގިނައިން އައީ ރަޝިޔާ، އިނގިރޭސިވިލާތް، ޖަރުމަންވިލާތް އަދި އިޓަލީންނެވެ.

ރާއްޖޭގެ ފަތުރުވެރިކަމުގެ ޓާގެޓެއްގެ ގޮތުގައި ފަތުރުވެރިކަމާބެހޭ ވުޒާރާއިން މިއަހަރު ކަނޑައަޅާފައިވަނީ 1.6 މިލިއަން ފަތުރުވެރިންނެވެ. ކޮވިޑާ ގުޅިގެން ރާއްޖޭގެ ބޯޑަރުތައް ބަންދުކުރުމުން އެއަހަރު ރާއްޖެ އައީ ފަސް ލައްކަ ފަތުރުވެރިންނެވެ.

ކޮވިޑަށްފަހު ރާއްޖޭގެ ފަތުރުވެރިކަމުގެ ޙާލަތު ރަނގަޅުވަމުން އަންނައިރު މިއަހަރުގެ ކޮންމެ މަހަކުވެސް ރާއްޖެއަށް ލައްކައަކަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.

ރާއްޖޭގައި މިހާރު ފަތުރުވެރިންނަށް ޚިދުމަތް ދިނުމަށް 1197 ތަނެއް ވަނީ ހުޅުވާފައެވެ. އެއީ ޖުމްލަ 59،351 އެނދެވެ.